Жетісу облысы. 20 тамыз. BM.KZ – Қаржылық мониторинг агенттігінің (ҚМА) облыстық департаменті ауыл шаруашылығына арналған субсидияларды жымқыру дерегі бойынша тергеу жүргізіп жатыр.
Тергеу мәліметінше, ЖШС басшысы екі жыл бойы жалған құжаттарды пайдаланып, мемлекеттен сүт өнімдерін қайта өңдеуге бөлінген субсидияларды заңсыз алып отырған.
Келтірілген залал көлемі 300 млн теңгеден асты. Шығындарды растау үшін «Ауыл шаруашылығы басқармасына» жеке кәсіпкерлерден шикі сүт сатып алу жөніндегі жалған есеп-қисаптар мен май өндіру бойынша жалған мәліметтер тапсырылған.
Сонымен қатар тергеу барысында күдіктінің заңсыз алынған 110 млн теңгені құмар ойындарға жұмсағаны анықталды.
Сот санкциясымен құны 300 млн теңгеден асатын зауытқа тыйым салынды. Күдіктіге қатысты бұлтартпау шарасы ретінде үй қамаққа алу түрі қолданылған.