Бізде қазір заң қатал. Қатал заң керек те шығар!? Әйелге ұрсуға болмайды, ұрсаңыз біттіңіз кеттіңіз «абақты» айдау, әйтеуір баяғыдай Ібір- Сібір жоқ. Әйтпесе талай қазақтың жігіті Сібірге кетіп, Ресей мен Украинаның арасындағы соғыста жалаң аяқ жар кешер еді. Молдалар айтып жатыр «әйелді ұруға емес-нұқуға болады» деп. Ал заң айтады. Әйелге әй деуге!
Қой деуге!
Өй деуге болмайды!-деп.
Бұл Бізге және Сізге арналған заң. Әйтпесе, кезінде бір үйдің, бір ауылдың, бір ауданның, бір облыстың емес республиканың қазынасын ұстағандар әйелдерін көкала қойдай қып жатырынан теуіп, басын жарып өлтіріп жатыр. Оларды заңгерлер қорғап әлек. Бұл заң кімге!? Байғұс қаратабан Біз бен Сіз сияқтыларға арналған…
Қазіргі әйелдер ақылды.
Тәлімгер солар,
Ақылды солар,
Еркектің рөлі сексенінші жылдың аяғында әдірәм қалды. Тоқсаныншы жылдары «байғұс бөріктілер» жаппай жұмыссыз қалғанда әйелдер қолдарына сөмке ұстап тауар сатты. Базарда тұрды. Тоңды. Жылынды. Сонсоң орыстың салтына кірді. Заманның тілін тауып отбасын асырады.
«Махаббат деген уақытша сезім» деп сексологтар ақыл айтып жатады. Құдай-ау, қай әжеміз сексологқа барыпты, солардың бетін көрмей, жүзін көрмей азы он, әйтпесе он бес балаға дейін дүниеге әкелді. Оқырмандарымнан ғафу өтінем. Қатты кетсем!..
Баяғыда жетпісінші жылдары Көкбай деген ақсақал, кемпірі тыртыңдай бастаса арқасына қамшы үйіріп сабап алады екен. Кезекті бір сабауында байғұс әжеміз:
Ұл тап дедің ұл таптым,
Қыз тап дедің қыз таптым.
Айналайын-ау Көкбай-ау,
Қай жерімнен мін таптың!?
деп жылапты. Солар сірә жаман болды ма?! Болған жоқ!
Әрине әйелді ұр, әйелді саба деп отырғаным жоқ. Әйел тіршіліктің дәнекері, әйел өмірдің гүлі. Әйел өмірдің нұры. Жүрсін көкеміз айтпақшы «Әйелдің мәні әйелде». Бәріміз де анадан тудық. Бі-рақ байғұс еркектің қазіргі таңда құны беш тиын. Ажырасса үйден кететін еркек. Бұрын әйел ерден кетсе де, елден кетпейтін. Қазір ол мәтел ауысты. Құны кетті. қадірі бітті. Әйел кетпейді, еркек кетеді. Дегеніне әйел жетеді.
Әй деп көр! Он бес күн түрменің быламығын жейсіз. Жегізеді. Әйел -гей болам десе құзіреті бар. Әйел сені менсінбей, басқамен көзіңізге шөп салса демократиялық заң бойынша құқығы бар. Пәтеріңіз де, көлігіңіз де әйелдер алып қала алады. Сонсоң сот алдында «жыласа болды» еркек байғұстың мойның бұрап тұрып балаға элемент төледі.
Кім жаман- еркек жаман!
Кім надан-еркек надан!
Кім сойқан-еркек сойқан!
Кім алқаш-еркек алқаш!
Кім пері-еркек пері!
Қысқасы әлемдік әдеби терминге кірген барлық нас сөз, пәле мен жаланың барлығы біздің еркектердің адресіне кеп жатыр.
Өткенде бір жаңалық ашқыш бауырымыз «Роботехникаларды ойластырып шығарып жатыр екен» болашақта әлгі құлтемірдің басындағы чипке «ыдыс жу, тамақ істе, кір жу» деп жазып кетесіз, барлығын тап-тұйнақтай қып қатырып қояды екен. Осыны әпенді Бико досыма айтып едім;-Еркек жасып ит болды, әйел тұлданып би болды, бөрікті алды, шашты алды, шалбарды алды, арақты алды, бәрін алды. Сонда жаңағы құлроботтар шықса, әйелдеріміз бала табатын аппарат бола ма? деп сұрақ қойды.
Ащы айтсам ғафу өтінем. Ел басына бұлт төнсе, қатын ұратын еркек емес, адал жүріп анық басатын қазақтың азаматтары қорғайды. Депутат, министірді білмеймін. Дайын ұшағына мініп кете баратын шығар! Олардың балаларынан да әсте үміт күтуге болмас! Көріп жатырмыз. Қарапайым отбасын асырап жүргендерді көлігімен соғып өлтіріп жатыр, әйелін сабап жатыр. Ылғи бай-бағланның балалары. Ал еркек ер болуы керек. Қатының сабаған еркек -еркек емес. Бірақ, қарапайым еркекті заңмен тұқыртып, ез қылу соншалықты кімге керек болды екен!? Әлде бізде қазақтың еркегінен де, көшедегі иті қадірлі ме!? Парламентте еркек болса, осы заңды қайта бір қараса екен!? Әй қайдам… Заң күшіне еніп кетті. Осы сорлағанымыз, сорлаған шығар!? Ертең еркектер біздің құқығымыз тапталып жатыр деп БҰҰ-на хат жазып жатса ҚЫЗЫҚСТАН сонда болармыз!
Бурабайдың Жеңісі