Қазақстанның «Байтақ» жасылдар партиясы ел экономикасын декарбонизациялауға ықпал ететін «Green Kazakhstan» атты қоғамдық қор құруды ұсынды, деп хабарлайды Баймедиа.кз.
Президент Қасым-Жомарт Тоқаевтың халыққа Жолдауында айтылған экологиялық сын-қатерлерге жауап ретінде партия экологиялық жағдайды жақсартуға, инвестициялық тартымдылықты арттыруға бағытталған жобаларды қаржыландыратын қоғамдық қор құру идеясын көтеруде. Бұл туралы Астана қаласында партияның бас ғимаратында өткен пресс-конференцияда айтылды.
«Green Kazakhstan» қорының жұмысын бастаған соң ұлттық ESG-платформасын құрып, ұлттық ESG қағидаларын әзірлеп енгізуді көздеп отырмыз. Бұл бағытта халықтың сеніміне ие бірде бір қор жоқ. Мәселе елдің экологиясы мен экономикасына, денсаулық сақтау саласына тікелей байланысты болғандықтан қордың жұмыстары ашық әрі сенімді болуы тиіс. Яғни, қайда, қанша теңге аударылып жатыр, нәтижесінде қанша пайда алынды, барлық қаржылық операциялар туралы ақпарат ашық жарияланғаны жөн.
Айталық, елдегі ірі компаниялар ауаға шығаратын зиянкештерге квоталарды тегін алады. Біз көміртек бірліктеріне нақты баға қойып, биржа арқылы жүзеге асыруды ұсынамыз. Қазіргі уақытта осы тетіктерді зерттеу үстіндеміз. Яғни, қор алдағы уақытта компанияларға квоталар алуға арналған ашық алаң болмақ», – деді «Байтақ» партиясының төрағасы Азаматхан Әміртаев. Партия елдің экономикасын декарбонизациялау үшін жаңа бағытқа көшу қажеттігін алға тартады. Осы мақсатта көміртек биржасын енгізген өзге мемлекеттердің тәжірибесі зерттелу үстінде.
Жаңа қордың ашылуы мен жоспарлары Атырау қаласында «Байтақ» жасылдар партиясы және облыстық ішкі саясат басқармасының бірлесуімен өткен «Таза Қазақстанмен байтақ болашаққа бірге» атты пресс-конференцияның тақырыбына да арқау болды. Шарада Қазақстанның «Байтақ» жасылдар партиясының атқарушы хатшысы Нұрлан Көптілеутегі, Республикалық «Байтақ Болашақ» эко альянс қоғамдық бірлестігінің атқарушы директоры Әлібек Қуаныш, «Байтақ» жасылдар партиясы Жасыл саясат департаментінін директоры Азамат Аяйберген сөз сөйлеп, жолдаудағы экологиялық тақырыптарға және қордың мақсатына тоқталып өтті.
«Қордың басты мақсаты – жасыл жобаларды, экологиялық тың бастамаларды қаржыландыру. Осыған байланысты әр өңірден экология бағытындағы ұсыныстарды, жобаларды қабылдауға дайынбыз. Алғашқы түсіндірме жұмыстарымыз Атырау өңірінен бастау алып отыр. Қордың мақсатына, бағыттарына қарай үкіметтік емес ұйымдардан қолдау күтеміз.
Экологиялық бағыттағы алғашқы қор өз жұмысын жақын арада бастайды. Алға қойған мақсаттарға жету үшін мемлекеттік органдармен, бизнес-құрылымдармен, халықаралық ұйымдармен және жұртшылықпен тығыз ынтымақтастықта бірлесе жұмыс істейміз деген ойдамыз. Айта кету керек, сонымен қатар қор «Қазақстан халқына» қорының үлгісі бойынша жұмыс істейтін болады» дейді Нұрлан Болатұлы.
Жиында спикерлер экологияны алдын-алуға бағытталған үкіметтік емес ұйымдардың жұмысымен танысып, қоршаған ортаны қорғау, оған тың идеяларды әкеле отырып, ауқымды жобаларды бірлесе жүзеге асыруға ниетті ұйым, топ уәкілеттерімен өзара пікір алмасты.