Астана. 2 ақпан. BM.KZ – Мельбурн қаласында теннистен Аустралияның ашық чемпионаты аяқталды. Ерлер арасындағы финалда «Үлкен дулыға» турнирлерінің 24 дүркін чемпионы, сербиялық Новак Джокович пен алты мәрте осы санаттағы жарыстарда топ жарған испаниялық Карлос Алькарас бас жүлдені сарапқа салды.
Финалға дейін-ақ турнирде тарихи көрсеткіш тіркелді. 38 жастағы Новак Джокович пен 22 жастағы Карлос Алькарас арасындағы жас айырмашылығы 15 жыл 349 күнді құрады. Мұндай айырмашылықпен «Үлкен дулыға» финалында теннисшілер бұған дейін кездеспеген.
Алькарас жеңіске жетсе, барлық төрт «Үлкен дулыға» турнирін ұтқан ең жас теннисші атануы тиіс еді. Ал Джоковичтің жеңісі оны 25 дүркін чемпион ретінде жаңа рекорд иесіне айналдырар еді. Айта кетейік, Новак Джокович бұған дейін «Үлкен дулыға» турнирлеріндегі 24 титулымен Маргарет Корттың көрсеткішіне теңескен болатын.
Финалда Карлос Алькарас өзінің әлемнің бірінші ракеткасы екенін дәлелдеп, Новак Джоковичті 2:6, 6:2, 6:3, 7:5 есебімен жеңді. Осылайша, ол Аустралияның ашық чемпионатында алғаш рет топ жарды. Бұл — Алькарастың «Үлкен дулыға» турнирлеріндегі жетінші чемпиондық атағы.