Астана. BM.KZ. 2 маусым — Бүгінгі күнге дейін өзге адамның орнына тест тапсыру дерегі анықталған жоқ.
Ұлттық тестілеу орталығының комплаенс-офицері Ғалымжан Мұхамедьяров Ұлттық тестілеу орталығының ҰБТ-ның барлық қатысушылары үшін адалдықты, ашықтықты және тең жағдайларды қамтамасыз етуді қолдайтынын атап өтті.
– ҰБТ – әрбір отбасы үшін үлкен сынақ. Әр түлектің артында айлар бойғы дайындық, мұғалімдердің еңбегі мен ата-ананың үміті тұр. Сондықтан біздің басты міндетіміз – тек өз біліміне сенген адал қатысушылардың құқығын қорғау. Осы мақсатта тестілеу пункттерінде бақылаудың бірнеше деңгейі қарастырылған. Кіреберісте металл іздегіштер және тұлғаны тану жүйесі (Face ID) жұмыс істейді. Бұл бөтен адамдардың кіруін және тыйым салынған заттарды алып өтуді блоктайды.
Аудиторияда үздіксіз бейнебақылау жүргізіледі. Барлық процесс ел бойынша бір мезетте ахуалдық орталықтан қадағаланады. Сондай-ақ сыртқы ортамен байланысты шектейтін техникалық шаралар қабылданған. Жүйеге араласу немесе белгіленген тәртіпті бұзу әрекеттері тіркеліп, тексеріледі, — деді Мұхамедьяров.
Оның айтуынша, ҰБТ басталғалы бері 283 ереже бұзушылық анықталған. Соның ішінде 168 адам кіреберістегі бақылау кезеңінде тестілеуге жіберілмеді. Тағы 115 қатысушы ереже бұзғаны үшін аудиториядан шығарылды. Бүгінгі күнге дейін өзге адамның орнына тест тапсыру (жалған адам кіргізу) дерегі анықталған жоқ.
– Тексеру ҰБТ аяқталғанмен бітпейді. Барлық бейнежазбалар 6 ай бойы қосымша талданады. Егер ереже бұзушылық кейін анықталса, нәтиже жойылады. Бұл ереже грант тағайындалып қойған жағдайларға да қатысты. Ешкім де алдау арқылы артықшылыққа ие болмауы тиіс. Грантты тек өз білімін дәлелдеп, бұл нәтижеге адал еңбегімен жеткен талапкер алуы керек.
Біз тек талапкерлерді емес, орталық қызметкерлерін де тексереміз. Заңсыз көмек көрсеткен немесе ереже бұзған қызметкерлер қатаң жазаланады, қажет болса материалдар құқық қорғау органдарына жолданады.
Біздің мақсатымыз – тек техникалық емтихан өткізу емес, қоғамның, ата-ана мен түлектің сенімін сақтау. Әділ емтихан – балаларымыздың жарқын болашағының кепілі.
Барлық талапкерлерге сәттілік тілеймін! Тек білімге сеніңіздер, — деп қорытындылады Мұхамедьяров.
Егер сізге тестілеу барысында орын алған ереже бұзушылықтар туралы мәлімет белгілі болса, оны ҰТО-ның комплаенс қызметіне +7 (7172) 57 59 51 нөмірі бойынша хабарлауыңызды сұраймыз.