2025 жылғы 5 сәуірде Алматы қаласында «Таза Қазақстан» тұжырымдамасы аясында экологиялық шара өтеді.
Көктемнің келуі, табиғаттың жаңаруы аясында экология мен ұлттық құндылықтарды ұштастыратын «Таза Қазақстан: Табиғат пен Ұлттың Бірлігінде» атты ауқымды шарамыздың куәсі болыңыз. Бұл шараға көршілес мемлекеттердің жасылдар партиялары мен дипломатиялық өкілдері, сондай-ақ жергілікті халық, билік өкілдері және қоғамдық ұйымдар қатысады. Шара барысында экологиялық мәселелермен қатар, қазақ халқының мәдениеті мен дәстүрлері, қолөнері және ұлттық ойындары насихатталады. Шараны ұйымдастырушы — «Байтақ» жасылдар партиясы.
Табиғаттың жаңаруы мен «Байтақ» жасылдар партиясы бір-бірімен үндес ұғымдар. Өйткені, көктем шуағынан нәр алып тіршіліктің бойына жан бітуі жаңа өмірдің нышаны. Сол сияқты біздің партия экологиялық тепе-теңдікті қалпына келтіруге, жасыл желекке қамқорлық жасауға және баршаға таза болашақ қалыптастыруға ұмтылады.
Шара барысында келесі іс-шаралар ұйымдастырылады:
- «Таза Қазақстан – Салауатты Өмір – Табиғатқа Құрмет» атты ағаш отырғызу акциясы.
- Ұлттық ойындар мен қолөнер көрмесі– қазақтың ұлттық ойындары мен қолөнер туындылары таныстырылады. Бұл көрмелерде ағаштан, теріден, жібектен жасалған бұйымдар мен ұлттық киімдер көрсетіледі.
- Қазақ халқының мәдени құндылықтарын насихаттау– арнайы концерттік бағдарламалар мен өнер көрсетулер ұйымдастырылады, ұлттық дәстүрлер мен құндылықтарды сақтау мен дамыту мәселелері талқыланады.
- Экологиялық білім беру– «Таза Қазақстан» концепциясы аясында экологиялық мәселелер мен оларды шешу жолдары қарастырылып, табиғат пен мәдениеттің өзара байланысы жайлы пікір алмасу өтеді.
- Табиғатқа құрмет көрсету– ұлттық ойындар арқылы табиғатқа деген құрмет пен оның қорғалуының маңыздылығы насихатталады.
Бұл шара экология мен мәдениеттің үйлесімді дамуына үлес қосып, қоғамды экологиялық жауапкершілікке және ұлттық құндылықтарды сақтауға шақырады. Байтақ жасылдар партиясы ұйымдастыратын бұл ауқымды шара еліміздегі экологиялық ахуалды жақсарту мен ұлттық мәдениетімізді сақтауға бағытталған маңызды қадам.