Астана. 7 сәуір. BM.KZ — «Артемида II» экипажы Жерден ең алыс қашықтыққа ұшу бойынша тарихи рекордты жаңартты, деп хабарлайды Анадолу.
252 752 миль – адамзат тарихындағы жаңа ғарыштық белес. «Артемида II» экипажы Жерден бұрын-соңды адам баласы жетпеген ең алыс қашықтыққа барды. Бұл туралы АҚШ-тың Ұлттық аэронавтика және ғарыш кеңістігін зерттеу басқармасы (НАСА) X әлеуметтік желісінде мәлімдеді.
– Бұл 1970 жылы «Аполлон-13» орнатқан алдыңғы рекордтан шамамен 4 102 мильге артық, – делінген хабарламада.
«Орион» ғарыш кемесі 6 сәуір күні Айдың тартылыс өрісіне сәтті енді. «Артемида II» миссиясы аясында астронавтар Жер серігін айналып ұшуы тиіс.
Бір тәулік ішінде олар Айдың арғы бетінен 7 500 шақырымға дейін жақындап, Жер мен Айды бір мезетте көру мүмкіндігіне ие болады. Сонымен қатар Күн тұтылуын да тамашалай алады.
Миссия барысында экипаж автономды режимде алты күнге дейін тыныс алуды қамтамасыз ететін жаңа скафандрларды сынақтан өткізеді.
Осылайша, «Артемида II» 1972 жылдан бері Айға бағытталған алғашқы пилоттық экспедиция болмақ.
Еске сала кетейік, «Орион» кемесі ғарышқа 1 сәуір күні ұшырылды. Бортта америкалық астронавтар Рид Уайсмен, Виктор Гловер, Кристина Кук, сондай-ақ Канаданың астронавты Джереми Хансен бар. Бұл – 1972 жылдан бері Айға бағытталған алғашқы пилотты кеме.
«Артемида II» миссиясының мақсаты – «Орион» жүйелерін алыс ғарыш жағдайында сынақтан өткізу, сондай-ақ Айдың үстінен ұшу кезінде оны фотоға түсіріп, құжаттау.
Жоспар бойынша, кеме Жер серігін 10 тәулік ішінде айналып өтіп, кейін Жерге қайта оралады.