Рудныйда топ болып, бірнеше рет бопсалау фактісі бойынша бес адамға қатысты үкімді өзгеріссіз қалдырды.
Іс материалдарына сәйкес, 2024 жылдың маусым айында Л., Д., М., Д. және Г. есімді азаматтар Рудный қаласының тұрғыны Х.-ның есірткі саудасына қатысы бар деген күдікпен оны қала сыртына алып шығып, күш қолданып, өміріне қауіп төндіру арқылы 10 миллион теңге талап еткен. Жәбірленушіде бұл сома болмағандықтан, олар оны екі автокөлігі, мотоциклі және қарда жүретін көлігін беруге мәжбүрлеген. Келтірілген материалдық шығын — 11,8 млн теңгені құрады.
Сонымен қатар, айыпталушылар көліктердің бірі азамат Б.-ның атына тіркелгенін біліп, оны да қорқытып, жалпы сомасы 3,4 млн теңгеге 5 iPhone маркалы ұялы телефон сатып алуға мәжбүрлеген.
Бұған дейін Рудный қалалық соты сотталушыларды ҚР Қылмыстық кодексінің 194-бабы 3-бөлігі 2-тармағы бойынша (ірі мөлшерде мүлікті алу мақсатында, алдын ала сөз байласу арқылы бірнеше рет күш қолданып бопсалау) кінәлі деп таныған.
“Бірінші сатыдағы сот сотталушыларды кінәлі деп танып, оларға жаза тағайындады: Д., Д. және М. — әрқайсысына 5 жыл бас бостандығынан айыру, ал Л. мен Г. — қылмыстық құқық бұзушылықтарды бірнеше рет жасағанын ескере отырып, әрқайсысына 5 жыл 6 ай бас бостандығынан айыру”, — дейді Қостанай облыстық соты.
Апелляциялық шағымда сотталушылардың қорғаушылары жаза түрін жеңілдетіп, бостандықты шектеу жазасын қолдануды сұраған. Алайда сот алқасы қылмыстың ауырлығын, келтірілген залалды және барлық сотталғандардың белсенді рөлін ескере отырып, жазаны жеңілдетуге негіз жоқ деген қорытындыға келді.
Апелляциялық алқа алғашқы сот үкімін күшінде қалдырды. Үкім заңды күшіне енді.