Астана. 5 қыркүйек. BM.KZ – Қазақстанның сыртқы істер министрі Мұрат Нұртілеудің қамауға алынғаны туралы тараған ақпарат шындыққа жанаспайды. Бұл жөнінде СІМ ресми түрде хабарлады.

Бүгін вице-премьер – сыртқы істер министрі Мұрат Нұртілеу «Harvest Group» компаниясының директорлар кеңесінің төрағасы Алмаз Әлсеновпен кездесті. Тараптар агро-индустриалды кластер құру жобасының жүзеге асырылу барысын талқылады.

Алғашқы кезеңде Жетісу және Алматы облыстарында 150 мың гектар жайылым мен тыңайған жерлерді суармалы егіншілікке көшіру жоспарланған. Жалпы жоба аясында 300 мың гектар жер игеріліп, заманауи су үнемдеу жүйелері қолданылады.

Министр мемлекет тарапынан қолдау көрсетуге дайын екенін атап өтті. Сонымен қатар, компанияның туризм мен спорт саласындағы инвестициялық жобаларын жүзеге асыру мүмкіндіктері сөз болды. Мұрат Нұртілеу бұл бастамалар ел ішкі және кірме туризмін дамытуға, сондай-ақ экономиканы әртараптандыруға үлес қоса алатынын айтты.

Осылайша, министрдің қамауға алынғаны жөніндегі қауесет ресми түрде жоққа шығарылды.

Еске салсақ, кеше бірқатар БАҚ, оның ішінде «Орда» басылымы, СІМ басшысы Мұрат Нұртілеу мен кәсіпкер Гаджи Гаджиевтің, сондай-ақ ұлттық қауіпсіздік комитетінің бірнеше қызметкерінің ұсталғаны туралы ақпарат таратқан болатын.