Астана. 17 қыркүйек. BM.KZ – АҚШ президенті Дональд Трамп New York Times газетіне қарсы 15 млрд доллар көлемінде сотқа шағыммен жүгінді. Ол басылымды «солшыл радикалды Демократиялық партияның виртуалды рупоры» деп айыптап отыр. Бұл туралы Euronews жазды.
Трамптың айтуынша, газет пен оның журналистері ол туралы, сондай-ақ отбасысы мен бизнесіне қатысты «жалған әрі жала жабатын материалдар таратқан». Бұл іс биыл бірнеше ай бұрын Wall Street Journal-ға қарсы қозғалған іспен үндес болып отыр.
Республикашылдар басқаратын Флорида штатында берілген талап-арызда New York Times журналистерінің бірқатар мақалалары мен олардың кітабы көрсетілген. Аталған материалдар 2024 жылғы президенттік сайлау алдындағы кезеңде жарияланған.
Өзінің Truth Social платформасында Трамп газетті сынға алып, соңғы президенттік сайлау кезінде оның демократиялық қарсыласын қолдағанын айтты. Ол «New York Times алғашқы бетіне Камала Харристі қолдағанын шығарды, бұл бұрын-соңды болмаған жағдай» деп жазды.
Бұл жағдайдан бірнеше күн бұрын америкалық басылым Ақ үйдің оған қатысты сотқа шағым түсіретіні туралы ескерткенін хабарлаған еді. Себеп – газет жариялаған мақалада Трамптың беделінен айырылған қаржыгер, кәмелетке толмағандарға қатысты сексуалдық қылмыстары үшін сотталған Джеффри Эпштейнге жазған делінген жазбасы туралы мәліметтің келтірілуі.