29 тамызда «Теңіз, Қашаған және Қарашығанақ кен орындары бойынша мұнай келісім-шарттарының шарттарын ашу арқылы Қазақстан экономикасының құрылымын өзгерту және азаматтардың әл-ауқатын арттыру» және «Мемлекет пен бизнестің өзара іс-қимылын өзгерту: «Атамекен» ҰКП-ның трансформациясы немесе тарату» тақырыбында үйлестіру кеңесі мен баспасөз конференциясы өтті, деп хабарлайды Баймедиа.кз.
«Байтақ» жасылдар партиясының төрағасы Азаматхан Әміртаев өз сөзінде: «Біздің назарымыз ел экономикасында шешуші рөл атқаратын, бірақ сонымен бірге экологиялық және әлеуметтік мәселелерді тудыратын мұнай саласына бағытталған. Талқылаудың негізгі өзегі – еліміздің ірі кен орындары (Теңіз, Қашаған және Қарашығанақ) бойынша мұнай келісім-шарттарының шарттарын ашу, осы саладан түсетін кірістер құрылымын өзгерту, соның ішінде мұнай мен газды терең өңдеу арқылы, сондай-ақ ESG қағидаттары мен тұрақты даму мақсаттарын сақтау мәселелері», – деп атап өтті.
Аталған келісімшартқа сәйкес негізгі өндіруші болғанына қарамастан Қазақстан млрдтаған АҚШ долларынан айырылып отыр.
« Мұнай кеніштерінен түсетін үлкен пайдадан Қазақстанның қағылып отырғанын көріп отырмыз. Шет елдік компаниялар жылына осы кеніштерден 30 миллиард доллар пайда көріп, мұртын майлап отыр. Жылына 30 миллиард доллар! Аз ақша емес! Ал басты қазынаның иесі Қазақстанға осы кеніштерден жылына 16 миллиард доллар кіріс кіруі тиіс еді. Бірақ ондай пайдадан біз қағылып отырмыз. Өйткені шет елдік компаниялармен біздің билік келісімшарт жасасқанда, шетелдіктердің мүддесіне сай, солардың ыңғайына орай келісімдерге қол қойылған. Соның арқасында шетелдік компаниялар еліміздің байлығын «заңды» түрде тонап отыр. Мұны қарапайым халық түсіне бермеуі мүмкін. Неге десек, жасалған келісімшарт, құжаттардың бәрі құпия. Ашықтық жоқ. Осының бәрін қазір қайта қарап, халықтың мүддесіне сай жаңа келісімдер жасалғаны жөн.
Жаңа шарт бойынша еліміздің үлесі кем дегенде 50 пайыз болуы тиіс деп есептейміз. Мәселен, әлгінде мысалға келтірген 16 миллиард долларды Қазақстан халқының санына шақсақ, әр азаматқа 800 доллардан келеді екен. Егерде сіздің отбасыңызда 5 адам болса, онда сіз жылына 4000 доллар кірістен қағылып отырсыз. Бұл халық болып ойланатын дүние. Осының бәрін есептей келе біз, «Байтақ» партиясы «Парасат» кәсіпкерлер альянысымен біріге отырып, Теңіз, Қашаған және Қарашығанақ мұнай-газ кенішітеріне байланысты жасалған бұрынғы яғни еліміздің мүддесіне сай емес ескі келісімшарттың күшін жойып, жаңа талаптар енгізе отырып, жаңа келісім жасалғанын қалаймыз. Сол үшін петиция жариялап отырмыз. Егер қажетті қол жинай алсақ, билік міндетті түрде халықпен санасары хақ. Сондықтан халық болып, петицияға қол қойып, еліміздің өзімізге тиселі байлығын шет елдік компаниялардан қорғайтын күн туды! Сондықтан өзімізге тиселі байлық, өзімізге қызмет етсін дейтін болсақ, белсенділік танытып, петицияға қолдау көрсетейік» дейді Азаматхан Әміртаев.
Петицияға төмендегі сілтеме арқылы өтіп, электронды цифрлық құжат арқылы қолдауға болады:
— «Парасат» Альянсының Үйлестіру кеңесі «Байтақ» жасылдар партиясының қолдауымен ТШО, ҚПО және НКОК бойынша ӨБК шарттарын ашуды талап етуде (https://epetition.kz/petition/aee8b730-6072-4a14-82c1-59ddf65c4b1);
— «Атамекен» ҰКП-ны трансформациялау немесе тарату туралы петиция (https://epetition.kz/petition/ff9173c5-d4e1-432d-b587-594c3aaba001