Астана. 4 желтоқсан. BM.KZ — Шымкент қалалық қылмыстық істер жөніндегі мамандандырылған ауданаралық сотында жасөсіпрімнің ісі қаралды. Сот, бозбаланы 7 жыл, 6 айға түрмеге жапты.
«ҚР ҚК 58 бабының 3 бөлігінің талаптарының негізінде Анар Асан Алтынбайұлына тағайындалған онша қатаң емес жазаны неғұрлым қатаң жазаға сіңіру арқылы түпкілікті 7 жыл, 6 ай мерзімге бас ботандығынан айыру жазасы тағайындалсын», -деді судья Бақыт Тыныбаев.
Сотталушы, енді жазасын кәмелетке толмағандарды ұстауға арналған қылмыстық атқару жүйесінің орташа қауіпсіздігі мекемесінде өтейтін болды.
Алайда, марқұм Диана Оңғарбаеваның туыстары бұл үкіммен келіспейді. Олар, сотталушыға неғұрлым қатаң жаза тағайындау керек деп санайды.
«7 жыл жаза, осындай ауыр қылмысқа өте жеңіл жаза. Оны өлтіріп, бір жерден пышақтамаған ғой. Мақсаты болған. Оны дәлелсіз қалдырып отыр. Мәйітті қорлауды алып тастаған. Пакетке салып мәйітті тастау ол қорлау ғой. Ол бала кәмелекет жасына толмаған деп, психолог беріп, қорғаушы беріп қорғап отыр. Біздің әпкемізді кім қайтарып береді. Екі қызға кім қайтарып береді», -деді марқұмның сіңлісі Айдана Оңғарбаева.
Айта кетейік, сот марқұмның балалары мен туыстарына 10 млн теңге моральдық шығын өтеуді міндеттеді.
Естеріңізге сала кетейік, қанды оқиға 21 шілде күні Шымкент қаласындағы жалдамалы пәтерлердің бірінде орын алған. Күдікті үй тазалаушы іздеп, әлеуметтік желі арқылы Диананы шақырған. Ол үйді тазалап болған соң, ақысын сұраған. Ал, сотталушы оны бермей, керісінше бірнеше жерден пышақ сұғып өлтірген. 26 жастағы Диана Оңғарбаеваның денесі 10 күннен кейін Шымкенттегі қоқыс жәшігінің жанынан табылған болатын.
Үкім заңды күшіне енген жоқ.