Оралда букмекерлік кеңселер арқылы құмар ойындарға қатысқан 16 мемлекеттік қызметкер жұмысынан босатылды. Бұл туралы өңірлік прокуратура мәлімдеді.
Мемлекеттік қызметкерлер арасында олардың құмар ойындарға байланысы бар-жоғын тексеру жүргізілген.
Нәтижесінде оралдық 24 лауазымды тұлға тәртіптік жауапкершілікке тартылып, оның 16-сы қызметінен босатылды.
Орал қаласы әкімдігінің бір қызметкері 2021 жылғы 5 маусым мен 2025 жылғы 22 қаңтар аралығында «OLIMPBET» букмекерлік кеңсесі арқылы өзінің жеке шотына 34 миллион теңгеден астам қаражат аударған. Соның ішінде, заңнамаға енгізілген өзгерістер күшіне енгеннен кейін — 1,7 миллион теңге салып, 971 мың теңгесін ұтылып қалған. Аталған дерекке байланысты ол қызметінен босатылды.
“Анықталғандай, Орал қаласы әкімдігінің, мемлекеттік кірістер және қалалық полиция басқармаларының жекелеген лауазымды тұлғалары букмекерлік кеңселер арқылы құмар ойындарға қатысқан. Аталған фактілер бойынша Орал қаласының прокуратурасымен Орал қаласы әкімдігіне, Мемлекеттік кірістер басқармасына және Батыс Қазақстан облысының Полиция департаментіне қадағалау актілері енгізілді”, — дейді Батыс Қазақстан облысы прокуратурасы.
Еске сала кетейік, 2024 жылғы 15 наурызда Атырау қаласында өткен Ұлттық құрылтайда Мемлекет басшысы жариялаған тапсырма аясында сыбайлас жемқорлыққа қарсы заңнамаға өзгерістер енгізілді. Соған сәйкес, 2024 жылғы 9 қыркүйектен бастап мемлекеттік қызметшілердің, оның ішінде онлайн форматта, құмар ойындар мен бәс тігуге қатысуы — сыбайлас жемқорлыққа қарсы шектеулерді бұзу болып саналады.
Фото: БҚО әкімдігі