Астана. 19 тамыз. /Нұргүл Ерғалиқызы/ BM.KZ — Мемлекет басшысының тапсырмасына сәйкес Үкімет атаулы әлеуметтік көмек (АӘК) пен тұрғын үй көмегін (ТКК) алатын азаматтарға тауарлық газ үшін цифрлық ваучерлер беру жөніндегі пилоттық жобаны іске қосты.
Бастама Энергетика министрлігі, Цифрлық даму, инновациялар және аэроғарыш өнеркәсібі министрлігі, Еңбек және халықты әлеуметтік қорғау министрлігі мен Ұлттық экономика министрлігінің бірлескен жұмысы аясында жүзеге асырылып жатыр. Жоба еліміздің барлық газдандырылған өңірін қамтиды.
Бұл шара президент Жолдауын іске асыру жөніндегі жалпыұлттық іс-шаралар жоспарының бір бөлігі ретінде қарастырылып, мемлекеттік қолдаудың ашықтығы мен тиімділігін арттыруды көздейтін «Әлеуметтік әмиян» цифрлық құралы арқылы жүзеге асырылып отыр.
Ол қалай жұмыс істейді?
АӘК және ТКК алушыларға газ төлеміне арналған жеңілдік ваучерінің қолжетімділігі туралы SMS-хабарлама 1414 нөмірінен жіберіледі. Жеңілдікті пайдалану үшін азаматтар eGov Mobile қосымшасындағы «Әлеуметтік әмиян» сервисі арқылы ваучерді белсендіруі қажет. Ол үшін тек «QazaqGaz Aimaq» АҚ-ның абоненттік жеке есепшотын көрсету жеткілікті. Қосымша құжаттарды ұсыну талап етілмейді.
Жеңілдік мөлшері әкімдіктер бекіткен тұтыну нормалары аясындағы газ көлеміне қолданылады. Орта есеппен оның құны газ төлемінің 27%-ына дейінгі бөлігін қамтуы мүмкін.
Жобаның негізгі мақсаты, әлеуметтік осал санаттағы азаматтарға нақты қолдау көрсету, сондай-ақ, коммуналдық төлемдердің отбасылық бюджетке түсіретін салмағын азайту. Бұдан бөлек, әлеуметтік көмек жүйесіне заманауи цифрлық технологияларды енгізу.