Астана. 26 қыркүйек. BM.KZ – Палестина жетекшісі Махмуд Аббас БҰҰ Бас Ассамблеясына жолдаған үндеуінде ХАМАС қозғалысының болашақ палестин үкіметіне қатысуын түбегейлі жоққа шығарды. Сондай-ақ ол ХАМАС пен өзге де топтар қаруын тапсырып, заңды билік органдарына бағынуы тиіс екенін мәлімдеді, деп хабарлайды Deutsche Welle.
Палестина ұлттық әкімшілігінің басшысы: «ХАМАС мемлекеттік институттарды басқаруда ешқандай рөл атқармайды», – деді бейнебайланыс арқылы Ассамблея делегаттарына арнаған сөзінде.
Саясаткердің айтуынша, ХАМАС пен өзге қарулы топтар міндетті түрде қаруларын тапсырып, заңды билікке бағынуы керек. Аббас халықаралық қауымдастықты Палестина мемлекетінің құрылуына қолдау көрсетуге шақырды.
Ол 2023 жылғы 7 қазандағы ХАМАС-тың Израильге жасаған шабуылын палестин халқын білдірмейтін әрекет деп атап, антисемитизмді айыптады. Сонымен қатар Газа секторындағы соғыс кезінде Израиль армиясының іс-әрекеттерін «соғыс қылмысы және адамзатқа қарсы қылмыс» деп сынады.
Аббас Нью-Йоркке келе алмады. АҚШ билігі шілде айында ПНА-ға қарсы енгізілген санкциялар аясында оған елге кіруге тыйым салған. Дегенмен, БҰҰ Бас Ассамблеясы көпшілік дауыспен Аббасқа бейнебайланыс арқылы қатысуға рұқсат берді.
26 қыркүйекте Израиль премьер-министрі Биньямин Нетаньяху Бас Ассамблеяда сөз сөйлейді деп жоспарланған.
Бұған дейін, 22 қыркүйекте Франция президенті Эмманюэль Макрон БҰҰ Бас Ассамблеясында Палестина мемлекетінің тәуелсіздігін мойындағанын жариялады. Одан бір күн бұрын Ұлыбритания, Канада, Австралия және Португалия да осы шешімін мәлімдеген. Жалпы, 22 қыркүйектегі жағдай бойынша, Палестинаны БҰҰ-ға мүше 153 мемлекет пен Ватикан мойындады.
Ал Германия Сыртқы істер министрі Йоханн Вадефуль Нью-Йоркке ұшар алдында жасаған мәлімдемесінде: Германия Палестина тәуелсіздігін екі мемлекет құру жөніндегі келіссөздер аяқталмайынша мойындамайтынын айтты. Сонымен бірге ол мұндай келіссөздер «қазірден басталуы керек» деп, израильдіктер мен палестиналықтардың бейбітшілік пен қауіпсіздікте өмір сүруіне мүмкіндік беруді қолдады.