Астана. 2 қазан. BM.KZ – Америкалық кәсіпкер Илон Масктың байлығы $500 млрд-қа жетіп, жаңа тарихи межені еңсерді, деп хабарлайды ТАСС.
Ол X әлеуметтік желісі, SpaceX, xAI және Tesla компанияларының иесі ретінде әлемдегі ең ықпалды бизнесмендердің бірі саналады.
Forbes дерегінше, 1 қазандағы сауда қорытындысы бойынша Масктың капиталы алғаш рет 500 млрд долларға жеткен. Кейін көрсеткіш сәл төмендеп, 499,1–499,5 млрд доллар аралығында бағаланды. Тек Tesla акцияларының бір күн ішінде 4 пайызға өсуі кәсіпкердің байлығын 9,3 млрд долларға арттырған.
Сарапшылар Маск дәулетінің өсуін бірнеше факторлармен байланыстырады. SpaceX компаниясының құны соңғы айларда 50 млрд долларға ұлғайып, жалпы бағасы 168 млрд долларға жетті. Сонымен бірге xAI компаниясы мен X әлеуметтік желісінің бірігуінен құрылған жаңа xAI Holdings құны 113 млрд доллар деп бағаланып отыр. Масктың үлесі – 53 пайыз, яғни шамамен 60 млрд доллар.
Маск Forbes-тың ең бай адамдар рейтингінде алғаш рет 2021 жылы Amazon негізін қалаушы Джефф Безосты басып озған еді. Ол кезде оның дәулеті 271,3 млрд доллар болған. Содан бері кәсіпкер бірнеше рет рейтингтегі көшбасшылықты жоғалтып, қайта иеленіп келеді.
Қазіргі таңда миллиардерлер тізімінде Маск бірінші орында тұр. Екінші орында – Oracle компаниясының директорлар кеңесінің төрағасы Ларри Эллисон ($351,6 млрд), үшінші орында – Meta компаниясының негізін қалаушы Марк Цукерберг ($246,1 млрд). Сондай-ақ алғашқы бестікке Amazon негізін қалаушы Джефф Безос ($233,2 млрд) пен Google негізін қалаушы Ларри Пейдж ($204,6 млрд) енген.