Ұлбосын Елмұрат – Шардара армспорт құрамасының жасөспірім спортшысы. Түркістан облысы, Шардара ауданынан шыққан нәзікжанды спортшы сенсациялық жеңіске жетті. Ол Болгарияның Албена қаласында өткен армрестлингтен 46-шы әлем чемпионатында топ жарып, ел мерейін үстем етті. Финалда 13 дүркін әлем чемпионы, словакиялық Лусия Дебрановамен қол күрестіріп, айқын басымдықпен жеңіп шықты. Бұл оның жеке жетістігі ғаана емес, Қазақстан армрестлингінің дамуындағы үлкен жеңіске саналып отыр. Осыған дейін Ұлбосын Елмұрат жасөспірімдер мен ересектер арасында Қазақстан Республикасының бірнеше дүркін чемпионы атанған еді. Сонымен қатар, ол әлем кубогінің иегері ретінде де танымал.
Армрестлингке деген қызығушылық: арман мен еңбек
Ұлбосын бала кезінен спортқа жақын болған. Ол жастайынан ауыл арасында қол күресімен айналысып, қызыға бастаған. Ең алғаш рет ауылда жарыс өтіп, жүлделі орыннан көрінген. Бұл оны армрестлингпен айналысуға алып келген.
«Мен армрестлингке бала кезімнен қызыға бастадым. Бұл спортқа алғаш қадам басуыма ауылымыздағы әпке-ағаларымыз себеп болды. Әсіресе, ауылда жиі өтетін кішігірім жарыстардың бірі мен үшін ерекше есте қалды. Сол сайыста екінші орын алып, алғашқы үлкен әсер мен мотивацияны сезіндім. Содан бері бұл спорт менің өмірімнің маңызды бөлігіне айналды», – дейді спортшы.
Басты құпия – жауапкершілік пен тұрақты жаттығу
Қол күресімен айналысу үшін тек табандылық керек. Сонымен қатар, күнделікті жаттығуға жауапкершілікпен қарау керек. Бұл жас спортшының ұстанымы. Оның айтуынша, спорттан тәжірибе жинау үшін әрбір жаттығу маңызды.
«Армрестлинг ерекше техника немесе ерекше құрал-жабдықты талап етпейді. Ең бастысы – жаттығуға салғырт қарамау, әрбір қимылды жауапкершілікпен жасау. Бастапқыда бұлшық еттің дамуына аса мән бермегеніммен, уақыт өте келе оның маңызы зор екенін түсіндім. Күн тәртібім де нақты құрылымға негізделген. Таңертең ерте тұрып, мектебіме барамын. Ал жаттығуларым түстен кейін, сағат 15:00-ден 18:30-ға дейін өтеді. Кешкі уақытта демалып, дер кезінде ұйықтауға тырысам. Бұл да спорттағы жетістіктерге тікелей әсер етеді», – дейді.
Жеңілгенді жер көтереді
Ұлбосын жеңіліс тапқан күнді сынақ деп қабылдайды. Әрбір сәтсіздіктен кейін өзіне қажетті сабақ алатынын айтады.
«Бүгінге дейін бірнеше жарысқа қатысып үлгердім. Әрбір сайыс өз алдына бір тәжірибе, бір сабақ. Солардың ішінде бір жарыс мен үшін ерекше әсер қалдырды. Күрес барысында қиын сәттер де болды, алайда менің жаттықтырушым Қалықұлова Меруерт апайымның кеңестері мені жеңіске жетеледі. Кейде жеңіліс те болады. Бірақ ешқашан мойымаймын. «Жеңілгенді жер көтереді» демекші, әр сәтсіздіктен кейін өзімді қайрап, алдағы жарыстарға тиянақты дайындаламын», – дейді
Отбасым мен достарымның қолдауы маңызды
Армрестлинг спортында табандылық пен қолдаудың маңызы зор. Ұлбосын Елмұрат өз арманына нық сеніп, үлгі тұтар тұлғаларынан шабыт алатын жас спортшы. Ол қыздарды қорықпай, спортты таңдауға шақырады және ел намысын қорғау жолында аянбай еңбек етіп жүр.
«Менің спорттағы жолымда отбасы мүшелерім мен достарым әрдайым қолдау көрсетіп отырады. Олардың сенімі мен жанкүйерлігі маған күш береді. Сондықтан да армрестлингке қызығатын қыздарға айтарым, қорықпаңыздар, келіңіздер, көріңіздер, өзіңізді осы бағытта сынап көріңіздер! Мен үшін үлгі болар тұлғалар бар. Оларды атап айтар болсам, Қарсыбаев Арман, Қалықұлова Меруерт және Мәлікайдар Ләззат. Олар өз еңбегімен көпке үлгі болып жүр. Мен де Алла қаласа, армрестлингтен Қазақстан Республикасына еңбек сіңірген спортшы болғым келеді. Бұл, үлкен мақсат. Оған жету жолында талмай еңбектенемін», – дейді Ұлбосын.
Ал спорттан тыс, бос уақытында саяхаттағанды жақсы көреді. Ел, жер көріп, өзге елдің мәдениетімен, салт-дәстүрімен танысқанды жаны сүйеді. Жаңа таным, жаңа көзқарас оның жан-дүниесіне серпін береді.
Нұргүл Ерғалиқызы
BM.KZ
Шымкент