Елордалық тілшілер алдында Шымкенттің әлеуметтік-экономикалық дамуы туралы есеп берген Ғабит Сыздықбеков әлеуметтік желілерде отырмайтынын айтты. Базарларды реттеу, қаланың ауасын тазарту, жасөспірімдер суициді сынды маңызды мәселелер тұрғанда әкімнің әр постқа лайк басып отыратын уақыты жоқ. Тіпті атышулы деген Берденов ісі де әкім араласатын шаруа емес. Ол құзырлы органдардың ісі.
Астанаға есеп бере келген өзге әріптестері секілді Ғабит Сыздықбековтің баяндамасы да оптимизмге толы. Айталық Шымкент, Астана мен Алматы секілді республикалық бюджеттің доноры болмаса да өңірдің экономикалық өсім көрсеткіштері де баршылық. Халықпен тығыз жұмыс істейтінін білдірген әкім әлеуметтік желілерінде үнемі белсенділігін көрсетіп келеді. Бірақ, ол баспасөз қызметінің жұмысы екен. Өз басы әлеуметтік желі, лайк деген мәселелерден аулақ.
«Жалпы PR, лайк дегенмен айналыспаймын. Әлеуметтік желілерде ресми парақшаларым бар. Оны мен емес, баспасөз қызметі жүргізеді. Маған керекті жерлерін жолдап отырады. Менің телефонымда, әлеуметтік желілер жоқ, себебі, уақытым жоқ. Лайк басу деген менің, біздің дәрежемізден төмен деп санаймын», – дейді ол.
Шымкент демекші, Руслан Берденовтің оқиғасын бүкіл ел болып сөз қылып жатқанда, үн қоспаған осы әкім ғана еді. Елордалық тілшілердің алдында өз орынбасарының басындағы жағдайға қатысты алғаш рет тіс жарды. Онда да еш тереңдемей, құзырлы органдарға сілтеумен ғана шектелді.
«Мен не дейін? Біз құқық қорғау, болмаса, сот шешімін шығаратын орган емеспіз. Болған жағдай орын алды, онымен арнайы органдар айналысты. Сот өзінің үкімін шығарды. Кінәлі адамдар өз жазасын алды», – дейді әкім.
Әкімнің өз басынан бөлек, елдегі үшінші мегаполистің мәселесі аз емес. Түтінге тұншыққан Алматының қатарына бүгінде Шымкент те қосылған. Айталық, Қазгидромет 25 қарашада ауадағы ластану деңгейі артып, күкіртсутегі көрсеткіші қалыпты мөлшерден 1,71 есеге асып түскенін жариялады. Жұрт аузында оның бәрі арнайы экономикалық аймақтан кеп жатқаны айтылады. Оның үстіне, кәмелетке толмағандар арасындағы суицид бойынша да Шымкент антилидерлердің қатарында.
Айта кетерлігі, былғы 10 айдың қорытындысы бойынша кәмелетке толмағандар арасындағы суицид дерегі жөнінен Шымкент антилидерлердің қатарында (13 оқиға). Тіпті, Алматы қаласынан да көп. «Бұл қаладағы жасөспірімдердің моральдық жағдайының нашарлығын, болашағына деген сенімсіздіктің деңгейін көрсетпей ме?» деген орынды сауал туындайды.
Әкімнің сөзінше, олардың анықтағаны, көбіне кішкентай балаларға әлеуметтік желілердің ықпалы бар. Одан бөлек, үйіндегі жағдай. Мысалы, әке-шешесінің арасындағы ұрыс, болмаса ажырасуы салдарынан, мектепте мұғалімдердің ұрысқан жағдайлары бар. Дегенмен, бұл мәселе бойынша жұмыс ұдайы жүргізіліп жатқанын айтады.
Сондай-ақ, мемлекеттік қызметкерлердің түрлі жемқорлық дерегіне қатысты сұрақтардың жауабын тергеу органдарына сілтеумен болған Сыздықбеков қала бюджетін барынша үнемдеп жатқанын да айтты.