Астана. 29 шілде.BM.KZ – Қазақстан Президентінің Түркияға ресми сапары жалғасып жатыр, деп хабарлайды Ақорда.
Қазақстан Президенті Қасым-Жомарт Тоқаев Түркия Республикасына ресми сапарының алғашқы күнін ұлт көшбасшысы Мұстафа Кемал Ататүріктің кесенесіне барып, оның рухына тағзым етуден бастады.
Сапар аясында Мемлекет басшысы бірқатар ресми кездесулер өткізді. Қасым-Жомарт Тоқаев Түркияның ірі бизнес өкілдерімен, атап айтқанда, YDA Holding компаниясының басқарма төрағасы Хусейн Арсланмен кездесіп, Қазақстандағы инвестициялық жобалардың жүзеге асырылу барысымен танысты.
Мәселен, түркиялық холдинг Түркістан, Астана және Петропавл қалаларында көпбейінді ауруханалар салу және пайдалану бойынша үш жобаны іске асырып жатыр.
Сондай-ақ компания Астанадағы YDA Industrial Park өндірістік кешенін кеңейтіп, сэндвич-панельдер шығаратын зауыт салуды жоспарлап отыр. Бұған қоса, Ақтау қаласында мультимодальді транзит хабын құру бастамасы ұсынылды.
Президент YDA Holding-тің Қазақстанға стратегиялық қызығушылық танытып отырғанын және елде жүзеге асырып жатқан инвестициялық бастамаларын жоғары бағалады.
Одан кейін президент Қасым-Жомарт Тоқаев S Sistem Lojistik компаниясының басқарма төрағасы Хусейн Барлинді қабылдады.
Кездесуде логистика саласындағы өзара тиімді және ұзақ мерзімді серіктестік перспективалары талқыланды. Президент Қазақстанды Еуразиядағы жетекші транзиттік хабқа айналдыру үшін Орта дәліз бағытында жан-жақты жұмыс жүргізіліп жатқанын атап өтті.
Қасым-Жомарт Тоқаев S Sistem Lojistik компаниясының Ақтөбе халықаралық әуежайында «Қазпоштамен» бірлесіп логистика орталығын салу бастамасына қолдау білдірді.
Хусейн Барлин жоба барысымен таныстырып, алдағы уақытта Астана, Алматы, Шымкент және Ақтау қалаларында да логистика инфрақұрылымын кеңейту жоспары бар екенін айтты. Президент логистика инфрақұрылымын кешенді дамыту транзит уақытын қысқартуға және экспорттық мүмкіндіктерді арттыруға ықпал ететінін жеткізді.
«Самұрық-Қазына» қорының басқарма төрағасы жаңа бастама еліміздің транзиттік әлеуетін арттыруға бағытталғанын айтады.
«Бүгін Анкарада Мемлекет басшысының ресми сапары барысында S Sistem Lojistik компаниясы өкілдерімен кездесу болды. Кездесу барысында компаниямен логистика саласында өзара тиімді әрі ұзақ мерзімді серіктестік орнату перспективасы талқыланды. Осы бағытта «Самұрық-Қазына» ұлттық әл-ауқат қорының еншілес ұйымы «Қазпошта» S Sistem Lojistik түрік компаниясымен біріккен кәсіпорын құрмақ. Бұл кәсіпорын Ақтөбе халықаралық әуежайында логистика орталық құрады. Аталған логистикалық хаб келесі жылдың екінші жарты жылдығында іске қосылады. Бұл жоба Қазақстанның логистикалық транзиттік әлеуеттін арттырып, түрік бизнесімен арадағы қарым-қатынасқа жаңа серпін береді», — дейді «Самұрық-Қазына» қорының басқарма төрағасы Нұрлан Жақыпов.
Айта кетейік, S Sistem Lojistik – Түркияның логистика секторындағы жетекші компаниялардың бірі. Қазіргі уақытта ол жалпы көлемі 100 мың шаршы метрден асатын қойма желісін басқарады.
Келесі кездесуде Қасым-Жомарт Тоқаев Tiryaki Holding атқарушы директоры Сүлеймен Тирьякиоғлымен жүздесті.
Онда агроөнеркәсіп саласындағы ұзақмерзімді серіктестікті дамыту, сондай-ақ өзара тиімді жобаларды іске асыру мәселелері талқыланды. Президент компанияның Астана қаласында бидай мен бұршақты терең өңдейтін зауыт салу жөніндегі шешіміне қолдау білдірді.
Сүлеймен Тирьякиоғлы бұл жоба қайта өңдеу өнеркәсібін дамытуға, заманауи технологияларды енгізуге және жергілікті мамандарды даярлауға мүмкіндік беретінін атап өтті. Сондай-ақ тараптар ауыл шаруашылығы өнімдерін тасымалдау логистикасын жетілдіру, қойма инфрақұрылымын цифрландыру және элеваторларды жаңғырту мәселелерін талқылады. Ал ауыл шаруашылығы министрі сапары аясында түрік бизнес өкілдерімен келіссөздердің нәтижелері мен уағдаластықтар туралы пікір білдірді.
«Қазақстан мен Түркияның ынтымақтастығы жылдан жылға нығайып келеді. Тауар айналымы 300 млн долларды құрайды. Бұл жұмысты әрі қарай жалғастырамыз. Өйткені әлі резевріміз бар. Айта кету керек, 2018 жылдан бері 23 инвестициялық жоба жүзеге асырылған. Соның 18-і іске қосылды. 5-і қазір жұмыс істеліп жатыр. Біреуі бойынша бүгін Tiryaki Holding компаниясының өкілімен кездесу өткіздік. Білесіздер, бізде бидай көп шығарылады. Сондықтан оны экспорттау үшін Астанада терең өңдеуі зауытын ашпақшымыз. Соған 160 млрд теңге инвестиция тартылады. Бірінші кезеңі – 110 млрд теңге. Екінші кезеңі – 50 млрд теңге. Бұл жоба өте маңызды. Бізде Солтүстік Қазақстан облысында бір-ақ зауыт бар. Бұл екінші зауыт болады. Басқа облыстарда да осындай жоба жалғасады», — дейді ауыл шаруашылығы министрі Айдарбек Сапаров.
Сонымен қатар, ел Президенті Orzax Group компаниясының басқарма төрағасы Селман Алимоғлыны қабылдады.
Тараптар жүздесу барысында биологиялық белсенді қоспалар өндіру саласындағы бірлескен жобаларды іске асыру мәселесін талқылады. Мемлекет басшысы компанияның Түркістан облысында зауыт салу шешіміне қолдау білдіріп, бұл бастама фармацевтика саласын әртараптандыруға және елдің экспорттық әлеуетін арттыруға ықпал ететінін атап өтті.
Селман Алимоғлы компанияның Қазақстанда өндірістік базаны ғана емес, сонымен қатар ғылыми-зерттеу және инновациялық бағыттарды да дамытуды көздеп отырғанын жеткізді. Orzax Group бүгінде биологиялық белсенді қоспалардың 150 түрін өндіріп, өнімдерін 60-тан астам елге экспорттайды. Қазақстандағы жобаның жалпы инвестиция көлемі – 40 миллион доллар. Компания 500 жаңа жұмыс орнын ашуды жоспарлап отыр.
Айта келейік, мемлекет басшысын салтанытты қарсы алу Анкарадағы Президент сарайында өтті. Сарай аумағына жеткенде Қазақстан Президентін Түркия басшысы Режеп Тайип Ердоған өзі қарсы алды. Екі елдің мемлекеттік әнұрандары орындалып, құрмет белгісі ретінде зеңбіректен 21 рет оқ атылды. Кейін мемлекет басшылары Құрмет қарауылының алдынан жүріп өтіп, ресми делегация мүшелерімен танысты.