Ақтауда 200-ден аса азаматтың айлығы 3 ай бойы төленбегені белгілі болды. Берешек суммасы 200 млн. теңгеге жуықтайды.
Бұл заңбұзушылық «Mangystau Oil Refining» ЖШС-не қатысты жүргізілген тексеріс барысында анықталған. Ақтау қаласының прокуратурасы 2025 жылдың қаңтар-наурыз айлары аралығында мекеме 241 қызметкерге еңбекақы төлемегенін. Жалпы берешек сомасы 197 млн. теңгені құрайды.
Құқық қорғау органының араласуынан кейін жұмысшылардың еңбекақысы толықтай өндірілді.
«Прокуратура азаматтардың еңбек құқықтарының сақталуын қамтамасыз ету бағытында жүйелі жұмысты жалғастырып, бұл бағытты қадағалау қызметінің басым міндеттерінің бірі ретінде айқындайды. Қабылданған қадағалау шараларының нәтижесінде жұмысшылар алдындағы берешек толық өндіріліп, жұмысшылардың конституциялық құқықтары қорғалды», — дейді Маңғыстау облысы прокуратурасы.
Сонымен қатар, заңды тұлға жалақыны уақытылы төлемегені үшін әкімшілік жауапкершілікке тартылды.