Ақтөбе облысында заңсыз аңшылықпен айналысқан ауыл тұрғынына қатысты қылмыстық іс қозғалды. Бұл туралы Polisia.kz хабарлайды.
14 шілде күні Алға ауданына қарасты Маржанбұлақ ауылы маңында полиция қызметкерлері жүргізген жедел-профилактикалық іс-шара барысында бұланға ұқсас жабайы жануарды сойып жатқан ер адам ұсталды.
Тексеру кезінде оның 30 жастағы жергілікті тұрғын екені анықталды. Ол жабайы аңды заңсыз атып алғанын мойындаған. Оның Lada-21214 маркалы автокөлігінен тіркелген ойық ұңғылы карабин табылып, тәркіленді. Көлік құралын тәртіп сақшылары аудандық полиция бөлімінің аумағына қойған. Қазіргі таңда қажетті сараптамалар жүргізіліп жатыр.
Күдікті үш жылға дейін бас бостандығынан айырылуы мүмкін. Сонымен қатар, мүлкі тәркіленуі ықтимал.
Полиция департаменті азаматтарды табиғатқа жанашырлықпен қарап, қоршаған ортаны қорғау заңнамаларын сақтауға шақырады. Сондай-ақ браконьерлік деректері туралы полицияға жедел хабарлауды сұрайды.