Ақтөбе қаласында «Harmony Rider Technology» деп аталатын қаржы пирамидасының қызметі тоқтатылды. Алаяқтар 115 азаматты алдап, жалпы сомасы 197 миллион теңгеден астам қаржыны заңсыз иемденген.
Күдіктілер өздерін АҚШ-та тіркелген, электр самокаттарын шығаратын ірі компания ретінде таныстырып, салымшыларға жоғары табыс уәде еткен. Алайда, тергеу олардың ешқандай өндірістік қызметпен айналыспағанын анықтады.
Жиналған қаражат алдымен OKX криптовалюта платформасына аударылып, кейін фиаттық валютаға айырбасталған. Ақша күдіктілердің жеке банк шоттарына шығарылып отырған.
Тергеу барысында заңсыз табыстың есебінен екі пәтер мен үш автокөлік сатып алынғаны белгілі болды. Қазір бұл мүлікке сот шешімімен тыйым салынды.
Аталған іс бойынша қылмыстық іс аяқталып, сотқа жолданды.