Экономиканың тұрақты әрі қарқынды дамуы маңызды. Бұл ретте ESG қағидаттарының рөлі басым. Соңғы жылдары жаһандық деңгейде кеңінен қолданысқа еніп келеді. Тіпті экономиканың ажырамас міндетті бөлігіне айналды. Былтырғы президент Жолдауында ESG қаиғдаларын қолданысқа енгізу бойынша тапсырмалар беріліп, кеңінен талқыға түскен болатын.
Қазақстанның «Байтақ» жасылдар партиясы аталған бағытта жоспарлы жұмыс істеуге, нақты іске көшуге дайын. Партия төрағасы Азаматхан Әміртаевтың тапсырмасы бойынша партияның атқарушы хатшысы Нұрлан Көптілеутегі өңірлердегі филиалдардың жұмысын жүйелендіру мақсатында кезекті сапармен Атырау өңіріне келді.
«Байтақ» жасылдар партиясының атқарушы хатшысы Нұрлан Болатұлы аталған бағыттағы жұмысты нығайту және өзара ашық диалог құру мақсатында Атырау облысы әкімінің орынбасары Жасұлан Орақұлымен, облыстық ішкі саясат басқармасының басшысы Гүлнұр Сүйеуовамен кездесіп, нақты келісімдер жасалды.
Сонымен қатар облыстағы партия өкілдерімен кездескен шарада бірлескен жұмыстағы жағымды өзгерістер, азаматтық қоғамды дамыту бағытындағы жаңа жобалар мен жұмыс жоспарлары айтылды. Сондай-ақ Атырау облысы мен аталмыш партия арасындағы қарым-қатынасты нығайтуға бағытталған іс-шаралар талқыланды.
Айта кетейік, жиын барысында мемлекет басшысы Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына арнаған Жолдауы тыңдалды.
«Ірі өнеркәсіптік кәсіпорындар, соның ішінде мұнай компаниялары шоғырланған Атырау облысы күрделі экологиялық мәселелермен бетпе-бет келіп отыр. Алайда оған қарамастан экологиялық проблемалардан бюджетке түсетін түсімдер жеткіліксіз деңгейде қалып отыр. Бұл алдағы уақытта экологиялық бағдарламалар мен жобаларды іске асыруда қиындық тудырады. Жасылдар партиясының командасы әкімдікпен бірлесіп, кәсіпорындардың экологиялық міндеттемелерді орындауын бақылаудың тиімді тетіктерін әзірлеуді ұсынды. Бұл жұмыстың маңызды бөлігі экологиялық жағдайға мониторингті күшейту және халықты бақылау процесіне тарту болуы тиіс.
Аймақта өсімдік биоөңдеуінің жаңа түрін енгізу мүмкіндіктерін талқыладық. Ғалымдар мен экологтар ұсынған бұл инновациялық әдіс –өсімдікті химиялық қорғау құралдарына таза баламаның бірі. Биологиялық өңдеу өсімдіктерді нығайтуға және олардың аурулар мен зиянкестерге төзімділігін арттыруға көмектесетін технологияларға негізделген» деді Нұрлан Көптілеутегі.
Кездесу барысында Атырау облысындағы экологиялық жобаларды дамыту перспективалары да талқыланды. Олардың қатарында аймақтың су ресурстарын қалпына келтіру және қорғау, табиғатты қорғау заңнамасын жетілдіру және ESG қағидаттарын енгізу жобалары бар.