Астана. 26 қаңтар. BM.KZ – Қала тұрғындарының шағымдары бойынша экологтар зертханалық тексерулер жүргізді.
Атырауда 25 қаңтар күні ауадағы күкіртсутектің концентрациясы рұқсат етілген нормадан бірнеше есе асып кеткен, деп хабарлайды РСК.
Табиғи ресурстар басқармасының дерегінше, «Қазгидромет» филиалының мамандары тұрғындардың шағымдарына байланысты үш жерде ауа сынамасын алған. Жүргізілген зертханалық талдау атмосфералық ауада күкіртсутектің шекті рұқсат етілген концентрациядан асқанын көрсетті:
• Кеңөзек ауылдық округіне қарасты Тасқала ауылында — 17,5 есе;
• Тасқала ауылына іргелес аумақта — 15,0 есе;
• Химиктер ауылында — 36,3 есе.
– Сынама алу кезіндегі метеорологиялық жағдай: желдің бағыты — солтүстік-солтүстік-шығыс, ауа температурасы — –9 °C, ауаның салыстырмалы ылғалдылығы — 81 %, – делінген хабарламада.
Зерттеу нәтижелері барлық уәкілетті мемлекеттік органдарға жіберіліп, тиісті шаралар қабылданатыны айтылды.
Санитарлық дәрігерлердің дерегінше, қауіпті концентрациядағы күкіртсутек өкпеде ісіну, орталық жүйке жүйесіне зақым келтіру және мұрын арқылы иісті сезу нервінің параличін туындатуы мүмкін, нәтижесінде адам иісті сезбей қалуы мүмкін.