Астана. 25 қыркүйек. BM.KZ – Бейсенбі күні Экономика вице-министрі Арман Қасенов ресми Астананың америкалық Chevron корпорациясымен Атырау облысындағы ең ірі мұнай-газ кен орны – Теңізді одан әрі игеру жөніндегі алдағы келіссөздеріне қатысты пікір білдірді.
«Президент (Тоқаев – BM.KZ) пен Chevron басшысының арасындағы әңгіме мазмұнына келсек, өкінішке қарай, мен ол кездесуде болған жоқпын. Сондықтан нақты пікір айта алмаймын. Келісімшарт, шатаспасам, 2034 жылы аяқталады. Алда үлкен жұмыс тұр. Үкімет тарапынан бұл бағыттағы жұмыстарды бейінді министрлік, яғни Энергетика министрлігі жүргізеді. Сондықтан болашақта жаңалықтарды сол министрліктен естиміз деп ойлаймын», — деді Қасенов ОКҚ-дегі брифингте BM.KZ тілшісінің сұрағына берген жауабында.
Еске салайық, дүйсенбі күні Қасым-Жомарт Тоқаев Нью-Йоркте америкалық инвесторлармен, соның ішінде Chevron корпорациясының директоры Майкл Уиртпен кездесті. Тараптар Теңізді кеңейту жобасының келешектегі жүзеге асырылуын талқылады.
Бұл кездесу биыл жыл басында президенттің Қазақстан Үкіметіне берген тапсырмасына байланысты ерекше қызығушылық тудырды. Ол кезде Мемлекет басшысы Chevron басшылығымен келісімді Қазақстан үшін тиімдірек шарттарда ұзарту бойынша келіссөздер жүргізу қажеттігін айтқан болатын. Келісімшарт 40 жылға жасалған және оның мерзімі 8 жылдан кейін аяқталады.
2025 жылдың басында Тоқаев Үкіметке шетелдік инвесторлармен өнімді бөлу туралы келісімдерді жаңа әрі Қазақстан үшін тиімді шарттарда ұзарту бойынша келіссөздерді жандандыруды тапсырды.
Энергетика министрлігі қазақстандық тарап шарттардың жақсартылуын талап етуге, жобалардың операторларын ауыстыруға құқылы екенін атап өтті. Инвесторлармен ресми келіссөздерге алдағы 2-3 жылда кірісу жоспарланып отыр. Ең өзектісі – келісімшарт мерзімдеріне байланысты «Теңіз» жобасы болып тұр. Шарт 1993 жылғы 2 сәуірде жасалған, 2033 жылғы 2 сәуірде аяқталады. «Теңізшевройлдың» негізгі акционері – Chevron кәсіпорынның 50% үлесіне ие.
Темірлан Құсбаев,
Астана,
BM.KZ