Бұл сурет тарихи мезеттің куәсі. Әйгілі композитор Шәмші Қалдаяқовтың жанындағы қыздар дүнген ұлтының өкілдері. Фото Жамбыл облысын аралап жүргенде досының үйінде түсірілген. Жиені Сара Имбарованың айуынша, елге мәлім «Дүнген қызы» әні осы кезде туған.
«Мынау сурет еш жерге шықпаған. «Дүнген қызы» деген әнін шығарған кезде осы досының үйінде болған. Фотода дүнген қыздары», – дейді Сара Есенбеккызы.
Жанашырлығымен есте қалды
«Нағашым алыста жүргендерді алаңдап жүретін» – бұл қазақ вальсінің королі, ұлы композитор Шәмші Қалдаяқовтың жиені Имбарова Сара Есенбеккызының естелігі.
Композитордың кіші қарындасы – Райхан Домбаеваның қызы Сара Имбарованың айтуынша, композитор өте жанашыр болған.
«Нағашым өзі жұмыста жүріп, маған оқуда жүргенде бір қорап алма алып келген. Бұл алыста жүргендерді де үнемі ойлап жүретінін көрсетеді. Шымкенттен оған пәтер беріп, есімін жаңғыртып, ескерткіш қойған кезде, ол еш ойланбастан сол пәтерді тұрғын үй мәселесі бар досына беріп жіберген. Ол туысы емес, тек досы еді», – ол.
Шәмші аға атағымен есік ашуға тыйым салды
Сара Имбарова нағашы ағасы өзімен мақтанғанды, атағын пайдаланғанды ұнатпағағанын айтады. Сөзінше, жақындары өзге біреуге туыстық байланысы барын айтуды құптамапты. Сара апай алғаш рет студент кезінде әнін сүйіп тыңдаған қатарластарының қасында жиені екенін айтқан. Онда да тұспалдап қана жеткізген екен.
«Осы әннің авторын білесің бе?» деп сұрады. Мен қуанып, «Әрине білемін!» деп мақтанышпен жауап беріп, авторын айтып, алғаш рет өмірімде Шәмші ағаның менің нағашым екенін мақтанышпен айттым. Шәмші аға бізге өзінің атымен ешқашан мақтануға, есік ашуға рұқсат етпейтін. Меніңше, ол бізді қорғайтын, арты кері әсер етпесін деп сақтандырған. Себебі ол жүйеге ұнамаған, ыңғайсыз адам еді», – дейді Сара Есенбеккызы.
Бүгін, 15 тамыз қазақ вальсінің падишасы Шәмші Қалдаяқовтың дүниеге келген күні. Көзі тірі болғанда 95 жасқа келер еді.
Әсел Мәдәліқызы,
BM.KZ