Шымкент. 18 тамыз. /Әсел Мәдәліқызы/ BM.KZ — Шымкент қаласы әкімінің орынбасары Руслан Берденовтің сотында бүгін жарыссөз өтіп, онда айыпталушы Ернар Жиенбай алдыңғы ұстанымынан айнымайтынын тағы нақтылады. Алайда өзінің жасаған ісін дұрыс деп айта алмайтынын да мәлімдеді.
«Алдыңғы сотта Жеңіс ағамыздан (Жеңіс Тыныбек, берденовтің заңды өкілі – ред.) ота жасау фотосын көрдім. Шынын айтсам, жүрегім ауырып кетті. Көп сұрақ қойып, талас-тартыс жасаудың керегі жоқ деп ойлаймын. Басында айтқан өз сөзімде қаламын. Алайда жігіт ретінде Құран ұстап та, детектормен де айта аламын. Менің ісімді басқа жастар істемесін. Әйелдеріңізбен ұрыссаңыздар, одан да ажыраса салыңыздар. Менің адам өлтіру деген пиғылым болмаған. Болмайды да”, — деді ол өз сөзінде.
Ал жасағанын тек ішінара мойындайтынын айтты.
«Қорқытайын деп оң тарапқа атқан едім. Берденов бір жауабында «артымнан қуалап жүріп атты» деген. Екінші жауабында «басымнан атты, еңкейіп өткізіп жібердім» деді. Олай Бэтмен ғана өткізе алады деп ойлаймын», – деді айыпталушы.
Сондай-ақ, ол қашып кетсін деп тура атпағанын айтады. Өйткені, сөзіне қарағанда, атып өлтіргісі келсе, құлаған соң тағы атуға болатын еді. Сондықтан Берденовтің «мені өлтірмекші болды» деуі бойынша 99-баптың 1-тармағымен жазалау негізсіз деп ойлайтынын жеткізді.
«11 жылға кетсем кетейін, 106-баппен саралауыңызды сұраймын, құрметті сот. Себебі балаларым өсіп келе жатыр. Олар «әкем адам өлтіруге оқталыпты» дегенін қаламаймын”, – деді Ернар Жиенбай.
Айта кетейік, бүгін түстен кейін жарыссөз басталып, онда мемлекеттік айыптаушы Ернар Жиенбайды адам өлтіруге оқталғаны үшін кінәлі деп танып, 11 жыл 3 айға бас бостандығынан айыруды сұраған еді.