Шымкент. 27 тамыз. BM.KZ — Шымкент қаласы әкімінің орынбасары Сәрсен Құранбек Руслан Берденовке қатысты мәлімдеме жасады. Оның айтуынша, ресми құжат болмағандықтан, ол әлі күнге қала әкімінің орынбасары ретінде есептеледі.
«Руслан Берденовтің жұмыстан кетуі туралы бұйрық әлі шыққан жоқ. Ресми түрде ол кісі еңбекке жарамсыз парағын аштырған. Емделіп жатыр. Әлі күнге әкімдіктің құрамында. Бірақ біздің білуімізде, Руслан Берденов бұдан былай әкімдіктегі жұмысын доғарғысы келетін болса керек, ондай болатын болса келіп өтінішін жаза жатар. Әркімнің өз таңдауы, ниеті. Денсаулығымен айналысамын деп шешкен болса керек. Ресми түрде бұйрық шықпайынша біз ол кісіні қала әкімінің орынбасары деп есептейміз», – деді Сәрсен Құранбек.
Оның айтуынша, қала әкімінің үш орынбасары жұмыс істеп жатыр. Қалған екі орынның бірінде – Берденов болса, екіншісі бос тұр.
Айта кетейік, осыдан бірер күн бұрын Шымкент қаласы әкімідігінде ауыс-түйіс болған еді. Қала әкімінің бірінші орынбасары лауазымына Айдын Мейрамбекұлы Кәрімов тағайындалды. Ол бұған дейін қала әкімінің орынбасары лауазымын атқарған. Сонымен қатар, Шымкент қаласы әкімінің орынбасары қызметіне Арман Сәбитов келді.