Мемлекет басшысы Қасым-Жомарт Тоқаевтың қаулысымен 1 тамызда еліміздің көлік саласын дамытуға, қатынас жолдарының инфрақұрылымын қалыптастыруға және жаңғыртуға қосқан елеулі үлесі үшін біраз адам орден-медальдармен марапатталды. Солардың ішінде 40 жыл бойы Шымкент әуежайында еңбек етіп, ұшақ жуып келе жатқан Нұрзейнеп Пірманова ерекше назарымызды аударды. Ол «Ерен еңбегі үшін» медалін президенттің өз қолынан қуанышты жандардың бірі. BM.KZ тілшісі марапат иесін тауып, оның осынша ұзақ бойы бір жерде тапжылмай, жалықпай жұмыс істеп келе жатуының сырын сұрап білді.
Нұрзейнеп Пірманова қолына сүрткіші мен шаңсорғышын алып ұшақтардың тазалығына жауап беретін жан. Ол Шымкент әуежайында 40 жылдан аса уақыт жұмыс істесе, соның 32 жылын әуе кемелерін тазалауға арнаған.
Жұмысын мақтан тұтатын жан
Ұшу аппараттарын жуу бір қарағанда қарапайым жұмыс. Алайда атқаратын міндеті аса жауапты. Себебі Нұрзейнеп апайдың еңбегі көрінбейтін, бірақ әр сапардың қауіпсіздігіне ықпал ететін жұмыс. Бар ғұмырын осы салаға арнаған әйел үшін бұл жай ғана күнкөріс емес, өмірлік миссия. Тіпті ол бұл саладан ауысу ойына келмегенін айтады.
«Жұмысымды мақтан тұтамын. Иә, ұшақ жуамын. Бұл маған ұнайды. Адал еңбеңіммен ақша тауып жатырмын. Басқа жаққа барып жұмыс істеу ойымда жоқ. Себебі мен өз жұмысыммен мақтанамын. Шаршаған емеспін, қайта жұмысқа барғым келіп тұрады», – дейді Нұрзейнеп Пірманова.
Қарапайым еңбек адамының қажырлы қызметі еленіп 1 тамыз күні президент Қасым-Жомарт Тоқаев Қазақстан Республикасының «Ерен еңбегі үшін» медалімен марапаттады.
«Марапат алатын кезде қобалжыдым. «Қалай болады? Не істеу керек?» деп уайымдадым. Бірақ бізді Ақордаға алып барып алдын ала дайындады. Марапатты алғанда қатты қуандым», – деп Нұрзейнеп апай әлі күнге мақтаныш сезімі басылмағанын білдірді.
Ғұмырының 40 жылын бір салаға арнаған
40 жыл – бір адамның ғұмырына тең уақыт. Осы аралықта талай мамандық ауыстыруға, түрлі салада бағын сынауға болады. Бірақ Нұрзейнеп Пірманова өзінің сүйікті ісін ешқашан ауыстырған емес.
Небәрі 20 жасында алғаш әуежай кеңістігіне аяқ басқан қыз сол күннен бастап бұл жерден алыстамады. Қыстың сықырлаған аязы, жаздың ми қайнатқан ыстығы, түнгі рейстер мен таңғы ұшулар – бәрінде Нұрзейнеп апай ұшақтардың қанаты мен әйнегін жарқыратып тазалап, жаңа сапарға аттануға дайындап отырды.
«Ұшақ болсын, тікұшақ болсын, нені жуу керек болса, қашан да дайынмын. Бізді келген рейске жібереді. Кішілерін 10 минутта, үлкендерін 15 минутта жинап шығуымыз керек. Одан кешіксек рейстің кешеуілдеуіне тура келеді. Сондықтан тез арада жуып, тазалап, шаңсорғышпен шаңын алып шығамыз», – дейді қолынан шаңсорғышын тастамаған Нұрзейнеп Пірманова.
Анасының жолымен баласы да авиация саласына келді
Бар ғұмырын Шымкент қаласына қонған әуе көлігін тазалаумен айналысқан ана баласының да осы салаға қызмет ететінін айтады.
«Менің көп уақытым жұмыста өтетін. Анда-санда барып тамағын жасап, нанын жауып кетемін, балаларым өздері үй жинайтын. Өсе келе үлкен балам әуежайдың тексеру бөліміне жұмысқа кірді. Қазір бірге жұмыс істейміз», – дейді ол.
40 жылдан аса маңдай терін төгіп, үздіксіз еңбек еткен Нұрзейнеп Жаңабекқызы үшін марапат тек жеке жетістік емес. Ол тасада қалып қойған, бірақ аса маңызды жұмысты абыроймен атқарып жүрген барлық қарапайым еңбек адамына көрсетілген құрметтің белгісі деп біледі.
Әсел Мәдәліқызы,
Шымкент, BM.KZ