Астана. 14 тамыз. /Нұргүл Ерғалиқызы/ — eGov Mobile қосымшасының жаңа, жетілдірілген нұсқасы қазақстандықтарға қолжетімді болды. Бұл соңғы жылдардағы ең ауқымды жаңарту болды. Қосымшаның дизайны түбегейлі өзгеріп, пайдаланушыға ыңғайлы болу үшін интерфейс жаңартылған. Сонымен қатар, навигация оңтайландырылып, интеллектуалды іздеу жүйесі мен виртуалды көмекші қосылған.
Жаңартудың басты жаңалығы, жасанды интеллектке негізделген eGov AI виртуалды көмекшісі. Ол іздеу жолағының жанында орналасқан. Пайдаланушының сұрағына нақты әрі түсінікті жауап беріп, қажетті қызметке бағыттайды. Бұл қызметтерді іздеуді едәуір жеңілдетіп, уақытты үнемдеуге мүмкіндік береді.
Іздеу жүйесі де айтарлықтай жақсарған. Мәселен, пайдаланушы сұраныс енгізген сәтте қызметтер мен өмірлік жағдайларға қатысты нәтижелер бірден көрсетіледі.
Бұдан бөлек, жаңартылған басты бетте ең танымал сервистердің жарқын белгішелері орналастырылған. Қызметтер каталогына өту үшін eGov логотипін басу жеткілікті. Қызметтер мен порталдар (мәселен E-лицензиялау) жүйеленіп, жеке бөлімдерге бөлінген.
Қосымшада жаңа баннерлер пайда болды. Олар қолданушыларды жаңалықтармен таныстырып, танымал қызметтерге жылдам бағыттайды.
«Сервистер» және «Цифрлық құжаттар» бөлімдерінде барлық цифрлық қызметке қол жеткізуге болады. Әр қызметтің қасында арнайы «бекіту» белгішесі бар. Бұл, оны «Танымалдар» тізіміне қосуды жеңілдетеді.
«Цифрлық құжаттар» бөлімі де оңтайландырылды. Жеке куәлік, паспорт, туу туралы куәлік сияқты маңызды құжаттар енді тікелей басты беттен көрінеді. Бұл оларды қажет болғанда жылдам көрсетуге немесе QR-код арқылы түпнұсқалығын растауға мүмкіндік береді.
Өмірлік жағдайлар бойынша жаңа функционал деген арнайы бөлім пайда болды. Онда медициналық мекемеге тіркелу, құжаттарды қалпына келтіру немесе жүргізуші куәлігін алу сынды әрекеттерге кезең-кезеңімен нұсқаулық берілген. Пайдаланушы интерактивті сауалнама арқылы өз жағдайына сай нақты шешім мен қажетті қадамдар тізбесін ала алады.
Қауіпсіздік және хабарламалар жүйесіде назардан тыс қалмады. Жаңарту барысында деректерді қорғау деңгейі көтеріліп, сыртқы қатерлерден қорғаныс күшейтілді.
«Хабарламалар» бөлімі енді тақырыптар бойынша топтастырылған. Бұл пайдаланушыға қажет ақпаратты оңай табуға көмектеседі. Сонымен қатар, қызмет мәртебелері мен сауалнама нәтижелері де осы жерден көрінеді.
Жеке профиль және деректер жүйесінде, пайдаланушының жеке мәліметтерімен қатар, отбасы, денсаулық, жұмыс тәжірибесі, айыппұлдар мен мүлікке қатысты деректері де қолжетімді. Сонымен қатар, берілген келісімдердің тарихын қарау мүмкіндігі де бар.