Астана. 8 тамыз. /Әсел Мәдәліқызы/ BM.KZ – Қазір 35 жасқа дейінгі жастар арасындағы жұмыссыздық 3,1%-ды құрайды. Ал болжам бойынша келесі жылы екі қолға бір күрек іздегендер көрсеткіші 3,4%-ға көтеріледі.
Ұлттық статистика бюросының мәліметінше, жыл басынан бері жұмыссыз ретінде тіркелген 15 пен 34 жас аралығындағы жастардың саны 118 мың.
Дегенмен мамандарға қажеттілік те жоқ емес. Мәселен, «Атамекен» ҰКП сауалнамасына сәйкес 2025-2027 жылдарға арналған кадрларға жалпы қажеттілік 91,8 мың адамды құрайды. Оның жартысына жуығы Алматы және Астана қалаларына, Қарағанды облысы мен Қызылорда облысына тиесілі.
Ал Еңбек және халықты әлеуметтік қорғау министрлігінің мәліметінше 2035 жылға қарай жалпы қажеттілік 2,9 млн адамға жетеді. Ведомства деректеріне сүйенсек, жұмыс күшіне деген негізгі қажеттілік 6 салада байқалады.
«Салалық бөліністегі еңбекке негізгі сұраныс салаларда қалыптастырылады: білім беру – 447,7 мың адам (15%), көтерме және бөлшек сауда – 251,3 мың адам (8,4%), денсаулық сақтау – 240,4 мың адам (8%), өңдеу өнеркәсібі – 231,4 мың адам (15,4%), ауыл, орман және балық шаруашылығы – 222,1 мың адам (7,5%), құрылыс – 216,8 мың адам (7,2%)», – делінген Еңбек және халықты әлеуметтік қорғау министрлігі таратқан мәліметте.
Айта кетейік, еліміз бойынша жалпы жұмыссыздар саны 450 мыңнан асады. Оның басым бөлігі Маңғыстау және Атырау облыстарында тіркелген.