Астана. 25 тамыз. BM.KZ — Бүгінде банктер қарызды мерзімінен бұрын өтегені үшін, егер ол алғашқы алты айда (бір жылға дейінгі мерзімге қарыздар бойынша) не бірінші жыл ішінде (бір жылдан астам мерзімге қарыздар бойынша) жүзеге асырылса, айыппұл санкцияларын алуға құқылы. Бұл шектеу барлық қарыз алушыларға қатысты қолданылады. Алайда, 2025 жылғы 31 тамыздан бастап заң өзгереді: мұндай айыппұлдар тек заңды тұлғаларға (компанияларға) қатысты қолданылады. Бұл жайлы Fingramota жазды.
Қарапайым адамдар, жеке тұлғалар үшін мерзімінен бұрын өтесе ешқандай айыппұл болмайды, берешекті кез келген уақытта қосымша айыппұл санкциясыз өтеуге болады.
Мерзімінен бұрын өтегенде әдетте банк екі сценарий ұсынады. Өзіңіз таңдаған нұсқаны жазып көрсеткен жөн, әйтпесе олар әдеттегі қалып бойынша кестені сол күйінде қалдыруы мүмкін.
Оның бірі, төлемді өзгеріссіз қалдыру арқылы мерзімді қысқарту. Бұл – пайыздар бойынша барынша үнемдеу: сіз кредит мерзімінің соңына тезірек жетесіз және көп артық төлем жасамайсыз. Өзіне ағымдағы ай сайынғы төлем ыңғайлы деп санайтын адамдар үшін қолайлы.
Мерзімін өзгеріссіз қалдырып, ай сайынғы төлемді азайту. Үнем аз болады, бірақ ай сайын қалтаңызда артық ақша пайда бола бастайды. Бұл ай сайын шығын көп болған жағдайда ыңғайлы.
Нені таңдау керек? Егер мақсат артық төлемді мейлінше аз төлеу болса, мерзімді қысқартқан жақсы. Егер бюджеттің орнықтылығы маңызды болса – төлемді азайтуды таңдаған дұрыс.
Мерзімінен бұрын өтеудің біраз артықшылығы бар. Пайыз бойынша төлем аз болады. Бұл тікелей қаржылық тұрғыдан алғандағы пайда. Борыштан тезірек құтылу мүмкіндігі бар.
Бюджеттің икемділігі. «Төлемді төмендету» нұсқасын таңдаса, қалта шығыны азаяды.
Кредит репутациясы. Уақтылы және мерзімінен бұрын жасалатын төлемдер нарық үшін тиімді болып табылады.