Астана. 4 ақпан. BM.KZ – Америкалық бизнесмен Илон Маск тарихта байлығы 800 млрд доллардан асқан алғашқы адам атанды.
SpaceX компаниясы xAI-ды сатып алғаннан кейін Илон Маск байлығы 800 миллиард доллардан асқан тарихтағы алғашқы адам атанды, деп хабарлайды Forbes. Дүйсенбі күні кешке жарияланған келісім Масктің байлығын 84 миллиард долларға арттырған.
Келісім нәтижесінде SpaceX Масктің ең ірі активіне айналды. Қазіргі есеп бойынша, ол біріккен компанияның 43 пайызына иелік етеді, оның құны 542 миллиард доллар деп бағаланады. Бұдан бөлек, Масктің Tesla компаниясындағы үлесі мен акция опциондарының жалпы құны жүздеген миллиард долларды құрайды.
Айта кетейік, бұл — соңғы бір жылға жетпейтін уақытта Маск компанияларының екінші рет бірігуі. Бұған дейін ол xAI мен X (бұрынғы Twitter) компанияларын біріктірген болатын.