Астана. 29 тамыз. BM.KZ – Астананың қылмыстық істер жөніндегі мамандандырылған ауданаралық сотында мемлекеттік қорғаныс тапсырысы саласында бюджет қаржысын жымқыру дерегіне қатысты атышулы іс қаралып, үкім шықты, деп хабарлайды Қаржы мониторингі агенттігі.
Еске сала кетейік, 2023 жылы Қаржы мониторингі агенттігі «Казспецэкспорт» РМК-ның лауазымды тұлғалары мен жеткізушілерді әскери өнімдерді сатып алуға бөлінген қаржыны жымқырды деген күдікпен ұстаған болатын.
Мемлекетке келтірілген залал көлемі 1,6 млрд. теңгеден асты.
Сот үкімімен РМК-ның бас директоры Арман Рамазанов 11 жылға, ал департамент директоры А.Құдабаев 10 жылға бас бостандығынан айырылды. Қалған 9 айыпталушы әртүрлі мерзімге сотталды.
Сонымен қатар, сот мемлекет мүддесіне 1,6 млрд. теңге көлеміндегі талапты қанағаттандырып, 607 млн. теңгенің мүлкі тәркіленді.
Үкім заңды күшіне енген жоқ.