Астана. 13 ақпан. BM.KZ — КХДР басшысы Ким Чен Ын қызы Ким Чжу Энің мәртебесін күшейтіп, оны болашақ мұрагер ретінде таныстыру бағытында жүйелі жұмыс жүргізіп жатыр. Бұл туралы Reuters агенттігі Оңтүстік Кореяның Ұлттық барлау қызметіне (NIS) сілтеме жасап хабарлады.
Сеул тарапының мәліметінше, Ким Чжу Э жуырда билеуші партияның отырысына қатысуы мүмкін. Барлау қызметі оның мұндай жиынға қатысуы, таныстырылу форматы және ресми мәртебесінің айқындалуы билікті кезең-кезеңімен тапсыру жоспарының жанама белгісі болуы ықтимал екенін айтады.
NIS-тің жабық брифингінен кейін депутат Ли Сон Кынның мәлімдеуінше, оңтүстіккореялық барлау қолданатын тұжырым да өзгерген. Бұған дейін Ким Чжу Энің кандидатурасы «қарастырылып жатыр» делінсе, қазір ол «мұрагер ретінде тағайындалу сатысында» деген сипаттама берілген.
Оңтүстік Корея барлау қызметі оның ел басқаруға дайындалып жатқанын алғаш рет 2024 жылғы 29 шілдеде мәлімдеген. Сонымен бірге, сценарий өзгеруі мүмкін екені және өзге кандидаттың таңдалу ықтималдығы да жоққа шығарылмаған.
Соңғы жылдары Ким Чжу Э әкесін әскери парадтар мен ресми іс-шараларда жиі ертіп жүр. 2025 жылғы қыркүйекте ол әкесімен бірге Қытайға барған. Сол кезде Yonhap агенттігі бұл сапарды билікті табыстауға дайындықтың белгісі болуы мүмкін деп бағалаған. Сарапшылардың пікірінше, оның жасы шамамен 13-те, алайда нақты туған күні ресми түрде жарияланбаған.