АСТАНА. 24 қыркүйек. BM.KZ – Итальян және әлемдік кинематографияның аңызға айналған жұлдызы Клаудия Кардинале 23 қыркүйекте 87 жасында дүние салды. Бұл туралы актрисаның агенті Лоран Саври хабарлап, оның Париж маңындағы үйінде балаларының ортасында көз жұмғанын мәлімдеді, деп жазады France24.
Клаудия Кардинале 1938 жылдың 15 сәуірінде Тунис маңында сицилиялық отбасында дүниеге келген. Жастайынан сұлулық байқауында жеңіске жетіп, әкесінің кеңесімен кино әлеміне қадам басты.
Өзінің шығармашылық жолында ол 200-ден астам фильмде ойнады. Кардинале Федерико Феллинидің «8 жарым», Серджио Леоненің «Бір кездері Қиыр Батыста», Анри Вернейдің «Ана» сияқты әйгілі картиналарына түсті.
Әлемдік кино өнеріне қосқан үлесі үшін Кардинале 1993 жылы Венеция кинофестивалінің «Алтын арыстан» жүлдесін иеленді. Бұған дейін, 1984 жылы, ол үздік әйел рөлі үшін Пазинетти сыйлығын алған, ал 2008 жылы Құрмет легионы орденімен марапатталды.
Агентінің айтуынша, Клаудия Кардинале артында тарихта мәңгі сақталатын күшті, шабыт сыйлайтын әйелдің және ұлы актрисаның бейнесін қалдырды.