Астана. 8 қыркүйек. BM.KZ – Сыртқы істер министрі Мұрат Нұртілеу өзінің “ұсталғаны” туралы ақпарат жалған екенін ресми мәлімдеді.
«Бұл жалған ақпарат, абсурд нәрсе», — деді ол президент Жолдауы алдында, Үкімет дәлізінде журналистерге берген сұхбатында.
БАҚ өкілдері министрден ақпарат тараған уақытта қайда болғанын сұрады. Ол өзінің жұмыста болғанын және шетелдік әріптестермен кездескенін айтты.
«Маған кім келді? Менен кім сұрады? Мен жұмыста отырдым. Сіздер көрдіңіздер. Жұмыс бойынша жиналыс өткіздім. Шетелдік ивесторлармен кездесу болған. Біз құқықтық мемлекетте өмір сүріп жатырмыз. Бұған қатысты тиісті органдар бар. Солар айналысады», — деді ол.
Мұрат Нұртілеу өзін қаралағандардың ісін жауапты мамандар қарайтынын жеткізді. Тіпті, бұған бас қатырмайтынын айтты.
«Мен мұны көңіліме алмаймын. Тіпті, елде де болмаймын. Бұл да бір сынақ шығар», — деді Мұрат Нұртілеу.
Естеріңізге сала кетейік, бірер күн бұрын БАҚ беттерінде Сыртқы істер министрінің ұсталғаны туралы ақпарат тараған еді. Алайда, сол күні министрдің әріптестері мен жауапты мекемелер бұл ақпаратты жоққа шығарған болатын.