Шымкент. 23 шілде. BM.KZ — Күннің ыстыған байланысты шектеуге қарамастан жүк тасымалымен айналысқан көлік иесіне 300-ден астам акт ресімделген. Олардың басым бөлігі Оңтүстік аймақтарда Түркістан, Жамбыл, Алматы, Қызылорда облыстарында тіркелді. Алайда, бұл актілерге айыппұл санкциясы қарастырылмаған.
Елімізде 1 маусым мен 15 тамыз аралығында ауа температурасы көтерілуіне байланысты жүк көліктерінің қозғалысына уақытша шектеу қойылған еді. Бұл талаптар «Жолдарда көлік құралдарының жүрісін тоқтату немесе уақытша шектеу қағидаларына» сәйкес жүзеге асырылады.
Ауыр жүк көліктерінің қозғалысына уақытша тыйым күн сайын сағат 11:00-ден 21:00-ге дейін енгізіледі. Бұл талап ауа температурасы 25 градустан асқан жағдайда күшіне енеді. Алайда, бұл тәртіп барлық жүк көліктеріне бірдей қаралмаған.
«8 санат бойынша келтірілген ерекшеліктерді ескере отырып, жүк көліктері тасымалды жүзеге асыра алады, себебі шектеулер барлық жүк тасымалына қолданылмайды», — деп хабарлайды Көлік министрлігінің баспасөз қызметі.
Тізімде халықаралық жүк тасымалдаушылар да бар. Атап айтқанда:
- халықаралық келісімдерге сәйкес халықаралық жүк және жолаушы тасымалдарын жүзеге асыратындар;
- төтенше жағдайларды болдырмау және жою шараларын жүзеге асыратындар;
- тез бұзылатын тамақ өнімдерін тасымалдайтындар;
- жолаушылар мен багажды тасымалдайтындар;
- қауіпті жүк тасымалдарын жүзеге асыратындар;
- қайта құру жұмыстары жүргізілетін учаскелерде жол-құрылыс жұмыстары жүргізетіндер, келісімшарттық ұйымдарға тапсырылған;
- Қарулы Күштер, басқа да әскерлер мен әскери құрылымдар, сондай-ақ әскери тасымалдарды жүзеге асыратындар;
- зардап шеккендерге гуманитарлық көмек тасымалдайтындар.
Ал Түркістандық жүк тасымалымен айналысатын жүргізушілер бұл алалау деп есептейді. Оның үстіне жол бойына жағдай жасалмастан, мұндай шектеу қою ақылға сыймайтын іс дейді.
«Өзіңіз ойлап көріңізші, Қазақстан өте үлкен. Жолдар алыс. Ерте жолға шықтық делік, шектеудің уақыты келгенде тұра салатын автотұрақ жоқ. Тұрақты іздеп жүруің керек. Ал түнде жүру қауіпті. Себебі түнде жол бойынша малдар көп жүреді. Алдымен шектеу қою үшін жағдай жасалу керек», — дейді ауыр жүк көлгінің жүргізушісі Жабрайл Қасымов.
Айта кетейік, рұқсат етілген салмақ параметрлерін бұзған жағдайда ҚР Әкімшілік құқық бұзушылықтар кодексіне сәйкес айыппұл қарастырылған. Маусым айынан бері осындай 560 әкімшілік хаттама толтырылып, 240 миллион теңгеден астам айыппұл салынған.