Астана. 25 қыркүйек. BM.KZ – Бейнеу ауданындағы № 99116 әскери бөлімінде борышын өтеп жүрген 18 жастағы Сұлтан Шынтеміров әлімжеттікке шыдамай бірнеше рет өз-өзіне қол салуға әрекеттенген. Қазір ол Маңғыстау облыстық психикалық денсаулық орталығында ем қабылдап жатыр, деп хабарлайды Kazinform.
Сарбаздың анасы Лаура Шынтемірованың айтуынша, ұлы әскерге келген алғашқы күннен бастап психологиялық қысымға ұшыраған. Әлімжеттікке шыдай алмаған ол бірнеше рет өз-өзіне қол жұмсауға әрекет жасаған.
— Маған оның командирі қоңырау шалып, «балаңыздың жүрегі мен бүйрегінде мәселелер бар, біз оны дәрігерге қаратуға апара жатырмыз» деді. Бірақ бұл шындыққа жанаспады. Негізінде, ұлымды психиатриялық ауруханаға жатқызған екен. Бұны мен әскери қызметкерлерден емес, басқа бір ананың аузынан естідім, — дейді Лаура Шынтемірова.
Облыстық психикалық денсаулық орталығының директоры Мәди Тоқановтың айтуынша, клиникаға өз-өзіне қол салуға бейім үш сарбаз жеткізілген.
— Өздеріне жарақат салған, білектері сырылған. Олармен психолог, психотерапевт мамандар жұмыс істеп жатыр. Жалпы жағдайлары жақсы, 2-3 күнде шығарамыз, — дейді орталық басшысы.
ҚР Қарулы Күштері Құрлық әскерлерінің баспасөз қызметі ресми түсініктеме беріп, Сұлтан Шынтеміров әскери бөлімге келгеннен бастап командирлермен және психологпен әңгіме кезінде бірнеше рет әскери қызмет атқарғысы келмейтінін мәлімдегенін хабарлады.
— 2025 жылғы 15 қыркүйекте Ш. қатардағы сарбаз «психикалық бұзылыстар» алдын ала диагнозымен Ақтау қаласындағы психоневрологиялық диспансерге госпитализацияланды. Бұл туралы әскери қызметшінің ата-анасына хабарланды. Қазіргі уақытта құқық қорғау органдары қатардағы сарбаз Ш.-ға қатысты ықтимал заңсыз әрекеттер фактісі бойынша тексеру жүргізіп жатыр, — делінген хабарламада.
Сонымен бірге, әскери ведомство сарбазды тереңдетілген тексеру үшін Астанадағы Бас әскери клиникалық госпитальға жіберуді жоспарлап отыр.
— Азаматтар мен бұқаралық ақпарат құралдары өкілдерін расталмаған ақпарат пен негізсіз пікірлер таратудан бас тартуға шақырамыз, — деп атап өтті Құрлық әскерлерінің баспасөз қызметі.