Астана. 1 қазан. BM.KZ – Мәжіліс депутаты Ермұрат Бапи Қазақстанның Бас прокуроры Берік Асыловқа Нұрбол Назарбаевтың рейдерлік әрекеттеріне қатысты депутаттық сауал жолдады.
Оның айтуынша, Қарағанды тұрғыны Қуат Ерментаев Нұрбол Назарбаев кесірінен бизнесінен айырылып, ауыр жағдайда қалғанын атап, көмек сұраған.
– Өткен аптада, қыркүйектің 25-індегі Мәжілістің жалпы отырысында депутат Ринат Заитов Президент Қасым-Жомарт Тоқаевтың Әділетті Қазақстан идеясын қолдау және оны жүзеге асыру жолындағы кінәраттарды жою мақсатында депутаттық сауал жолдаған еді. Онда Болат Назарбаевтың ұлы Нұрбол Назарбаевтың заң мен әділет атаулыны белден басып, бірқатар азаматтарға қатысты жасаған қиянаттары турасында сөз болады. Егер мүдделі құқық қорғау органдары азаматтар атынан жолданған көз жасқа толы өтініштерді жылы жауып қоятын болса, бұны Президент Тоқаевтың Әділетті Қазақстанды қалыптастыру бастамасына қарсы жасалған нақақ қастық, – деді Бапи Мәжілістің жалпы отырысында.
Сондай-ақ ол бұның Нұрбол Назарбаевқа қатысты Мәжіліс тарапынан немесе депутаттар өзара ұйымдастырған ешқандай жоспарлы әрекет еместігін айтты. Оз сөздерін депутат атышулы әулет өкілдерінің елде отыз жылға жуық жасаған қиянатты қысастығы мен заңсыздықтарынан зардап шеккен азаматтарға қатысты әділеттілікті орнатудың әрекеті деп түсіндірді.
– Нұрбол Назарбаевтың бизнесті рейдерлік жолмен тарту алу әрекеттеріне қатысты бұған дейін де бірнеше өтініш келіп түскен. Олардың бірқатарын бұрын да мен жазбаша түрде Бас прокурордың атына жолдағам. Еске сала кетейін, әділет іздеген бір емес, екеу емес, бір мыңнан астам адамнан Алматы облысы, Қарасай ауданы, бұрынғы Каменский мал асылдандыру зауыты жұмысшыларының атынан келіп түскен өтінішті мен үш рет депутаттық сауал ретінде жолдағаным осында отырған әріптестерімнің есінде болар. «Мықтының арты диірмен тартады» дегендей, ағасына арқаланған Нұрбол Назарбаев бүкіл бір кеңшар жұмысшыларының жекешелендіруге берілген 9 мың гектардан астам жер үлесін тартып алғаны жөніндегі менің депутаттық сауалым Бас прокурордың алдында да сөз болған еді.
Міне сол мықты Нұрбол Назарбаев жасаған зорлықтан араша сұрап, рейдерлік жолмен тартып алынған бизнесін қайтарып беруді өтінген Қарағандылық Қуат Ерментаев деген азаматтан тағы да өтініш келіп түсті. Бұл жігіт сол рейдерлік шабуылдан кейін барлық мүлкінен айырылып, таза тақырға отырып қалған, – деп депутат сөзін жалғады.
Оның айтуынша, 2022 жылы Алматы прокуратурасы мен Алматы қаласы бойынша экономикалық тергеу-тексеру департаменті Қуат Ерментаевтың мүлкін, атап айтқанда, «PORUS» ЖШС-дегі үлесін рейдерлік басып алу фактісі бойынша қылмыстық іс қозғаған. Бірақ арада екі жыл өткенде, 2024 жылы Алматы қаласының прокуратурасы қозғалған қылмыстық істі «қылмыстық құрамның болмауына байланысты» деген желеумен тоқтатқан.
– Мен тек 2022 жылы қозғаған қылмыстық істі қайтадан көтеріп, зар илеп, жапа шеккен өтініш иесінің аргументтерін құлаққа ілсеңіздер жеткілікті деп ойлаймын. Қайтадан көтерілген сол істің заңды нәтижесі жөнінде мені ғана емес, бұрынғы биліктің Нұрбол Назарбаев сияқты қиянатшыларынан зардап шеккен қоғамды да хабардар етсеңіздер деп сұраймын.
Заңсыздықтардан зәбір көрген қоғамға қорған болайық, Бас прокурор мырза! – деп Ермұрат Бапи сөзін түйіндеді.