Мемлекет басшысы Қасым-Жомарт Тоқаев Ұлы Отан соғысының ардагері, «Халық қаһарманы» Әбдіғали Қаймолдиннің дүниеден өтуіне байланысты оның отбасы мен жақын туыстарына көңіл айту жеделхатын жолдады.
«Әбдіғали Қаймолдин жастай майдан даласына аттанып, ерен ерлігімен жеңісті жақындатуға зор үлес қосқан батыр тұлға болды. Бейбіт кезеңде мемлекеттік және қоғамдық істерге белсене араласып, ел игілігі жолында ұзақ жыл қызмет етті. Ғасыр жасап, соңына өнегелі жол қалдырған Әбдіғали Қаймолдиннің жарқын бейнесі мен есімі ұмытылмайды. Иманы саламат, жаны жаннатта болсын», — делінген жеделхатта.
Әбдіғали Қаймолдин 1921 жылы 30 маусымда Семей облысының Абыралы ауылында дүниеге келген. Ол соғыс жылдары танкке қарсы артиллерия құрамында зеңбірекші, оқтаушы, кейін командир қызметін атқарды.Маршал А.М. Василевскийдің басшылығымен 1-ші Украина, 3-ші Беларусь және Балтық жағалауы майдандарында шайқасып, Харьковті азат ету операциясына қатысқан. Кейіннен майдандағы ең ауыр бағыттарға жіберілетін артиллериялық дивизияда қызмет етті.
Жауынгерлік еңбегі үшін «Қызыл жұлдыз», «Ұлы Отан соғысы» ордендерімен, «Жауынгерлік еңбегі үшін», «Кенигсбергті алғаны үшін» және «1941-1945 жж ҰОС Германияны жеңгені үшін» медальдарымен марапатталған.