Астана. 12 тамыз. BM.KZ – Бас прокуратура биылғы 7 айдағы инвестициялық жобаларды қолдау, бизнесті қорғау және активтерді мемлекетке қайтару бағытында атқарылған жұмыстар туралы мәлімет берді.
Прокуратура органдары 2023 жылдан бері 1 522 инвесторға қолдау көрсетіп, жалпы құны 8,3 трлн теңгелік жобаларды іске асыруға көмектескен. Бұл ондаған мың жұмыс орнын құруға және сақтауға мүмкіндік берген. Биыл ғана мобильді топтарға 800-ден аса кәсіпкер жүгініп, әр төртінші өтініш расталған. Кәсіпкерлердің шағымдары негізінен тексерулердің заңдылығына, шектеу шараларына және әкімшілік жауапкершілікке тарту мәселелеріне қатысты болған. Нәтижесінде 86 қадағалау актісі енгізілген.
Инвесторларды қорғау үшін биыл бірінші тоқсанда заңнамада «прокурорлық сүзгі» енгізіліп, рұқсат алу рәсімі жеңілдетілген және мемлекеттік органдар шешімдерінің ашықтығы артқан.
«Активтерді қайтару комитеті 2025 жылы 354 млрд теңгеден астам қаржыны мемлекетке қайтарды. Бұл қаражаттың есебінен 400-ден астам әлеуметтік нысанның құрылысы қаржыландырылып жатыр. Соның ішінде 333 нысанның құрылысы басталды, денсаулық сақтау және спорт салаларында 33 жоба аяқталды», – деп жазылған Бас прокуратура мәлімдемесінде.
Бюджет қаражатын тиімді пайдалану мақсатында тексерулер нәтижесінде 5,7 млрд теңге өндіріліп, 259 млрд теңгеге жоспарланған 641 мемлекеттік сатып алу жойылған, 1 519 адам түрлі жауапкершілікке тартылған.
Сонымен қатар, азаматтық және әкімшілік істер бойынша 166 сот актісі жойылып немесе өзгертіліп, мемлекет мүддесіне 6,2 млрд теңге қорғалған. Жалпы, прокуратураның шаралары арқылы мемлекетке 716 млрд теңге қайтарылып, ал мемлекеттік сатып алуда 109 млрд теңге көлеміндегі ықтимал шығындардың алдын алған.