Бүгін Әлеуметтік-мәдени даму комитетінде мемлекеттік ақпараттық саясатты жетілдіру және өңірлік бұқаралық ақпарат құралдарын, оның ішінде баспа басылымдарын мемлекеттік қолдау туралы кеңейтілген отырыс өтті. Жиынға комитет төрағасы Асхат Аймағамбетов жетекшілік етті.
Мәдениет және ақпарат вице-министрі Қанат Ысқақов бүгінде елімізде төрт мыңға жуық газет-журнал шығарылатынын айтты. Оның сөзінше, 2024 жылы газетке 360 312 жеке тұлға және 7687 заңды тұлға жазылған.
Вице-министр газет-журналдарды өңірлерге, оның ішінде шалғай ауылдарға дер кезінде жеткізу және қаржыландыру мәселесі жыл соңына дейін шешілетінін жеткізді. Сондай-ақ министрлік банк қосымшасы арқылы газеттер мен журналдарға онлайн жазылу мүмкіндігін ұйымдастырған.
Отырысқа қатысушылар тақырыпқа қатысты сұрақтарын қойып, пікірлерін ортаға салды. Депутаттар мемлекеттік ақпарат саясатының тиімділігін арттыру, аудандық газеттерді сақтап қалу, қолдау, өңірлік БАҚ-ты дамыту, газет оқу мәдениетін қалыптастыру, оқырмандарды тарту менеджментін қолға алу, қаржыландыру және қызметкерлердің жалақысын арттыру, контент мазмұнын бақылау мәселелерін айтты.
Асхат Аймағамбетов масс-медиа туралы заң жобасына бүгінгі тақырыпқа қатысты депутаттар енгізген бірнеше маңызды нормаға тоқталды. Атап айтсақ, өңірлік басылымдар мен балаларға арналған бағдарламаларды қолдау бойынша өзгерістер бар.