Шымкент. 24 шілде. BM.KZ – Қазақстаннан Қара теңіз арқылы экспорттың уақытша тоқтатылуы жөніндегі хабар бүгін қазақстандықтар арасында қызу талқыға түсті. Шешімнің әлемдік нарыққа тигізер салдарын халықаралық Reuters агенттігі бағалап жатқанда, бұл мәселеге отандық мұнай-газ сарапшысы Артур Шахназарян да пікір білдірді.
Көптеген агенттіктің айтуынша, Қазақстан мұнайын шетелге тасымалдаумен негізінен америкалық энергетикалық алпауыттарға тиесілі консорциум айналысады. Осы ретте Ресей мен АҚШ арасындағы күрделі қарым-қатынасқа байланысты сарапшылар қандай да бір келеңсіз жағдай туындап кетуі мүмкін деп алаңдаулы.
Артур Шахназарян BM.KZ тілшісіне ешқандай алаңдауға негіз жоқ екенін айтады.
«Бұл — уақытша шара, мерзімі ұзақ болмайды деп ойлаймын. Алаңдауға себеп жоқ. Үш апта — аса маңызды емес. Босфордағы танкерлер бірнеше апта бойы тұрып қалатын жағдайлар жиі кездеседі. Бұл — мұнай тасымалындағы қалыпты халықаралық тәжірибе. Мұндай кідірістер экономикаға айтарлықтай зиян келтірмейді деуге болады», — деді сарапшы.
Сондай-ақ сарапшы болашақта мұндай күтпеген жағдайлардың қайталану мүмкіндігіне де пікір білдірді. Оның айтуынша, қазіргі күрделі ахуалда кез келген жайт орын алуы мүмкін, ештеңеге кепіл жоқ.
«Көрші елде соғыс жүріп жатқанда, кез келген жағдай орын алуы мүмкін. Дегенмен, Қазақстан мұнайын тасымалдайтын барлық танкерлер сақтандырылған», — деді Шахназарян сөз соңында.
Еске салайық, бүгін Қазақстан мұнайының Қара теңіз арқылы экспорты уақытша тоқтатылғаны хабарланды. Бұл шешім Ресей енгізген жаңа ережелерге байланысты қабылданған. Оған сәйкес, шетелдік мұнай танкерлеріне Ресейдің Қара теңіздегі негізгі порттарында жүк тиеуге уақытша тыйым салынған.