Астана. 3 қазан. BM.KZ – Қарағандыда 38 жастағы ер адамның 15 жастағы мектеп оқушысымен «неке қиюына» байланысты қоғамда үлкен резонанс тудырған қылмыстық іс бойынша сот процесі басталды. Іс жабық режимде өтіп жатыр.
Айыпталушыға кәмелетке толмағанды зорлау бабы бойынша айып тағылған. Егер кінәлі деп танылса, ол 15 жылдан 17 жылға дейін бас бостандығынан айырылуы мүмкін.
Оқиға биыл наурыз айында Абай қаласында болған. Тергеу деректеріне сәйкес, жасөспірімнің анасы мен өгей әкесі оны діни рәсім арқылы отбасы болып араласып жүрген 38 жастағы ер адамға ұзатқан. Қыз бірнеше күн оның қолында болып, зорлық көргенін айтқан. Кейін ол қашып, туған әкесіне барып, ол құқық қорғау органдарына жүгінген.
Сот алдында тек 38 жастағы күдікті отыр. Алайда қыздың әкесі бұл іс бойынша анасы мен өгей әкесінің де жауапқа тартылуын талап етуде.
— Бұрынғы әйелім мен оның күйеуі іс бойынша тек куәгер ретінде қатысып отыр. Бірақ олар қызымды өз қолдарымен 40-қа таяған досына ұзатты. Бұл жай қателік емес, бұл — қылмыстық сыбайластық. Олар қызымның өмірін талқандады, ал қазір сот залында жай ғана куәгер болып отыр, – дейді әкесі.
Оның айтуынша, жазда ол жергілікті прокуратураға ресми сауал жолдағанымен, жауап болмаған. Қыркүйекте Қазақстан Республикасының Бас прокуратурасына шағым түсіріп, күдіктімен бірге анасы мен өгей әкесінің де жауапқа тартылуын талап еткен.
Өтінішпен бірге ол бірнеше дәлел ұсынған: әжесінің қазақ тілінде қызды ұзатуға үгіттеген аудиожазбасын және анасы мен өгей әкесінің қызын «бұзылған» деп балағаттап отырған бейнематериалды тапсырған.
Бұған дейін қамқоршылық органдары анасы мен оның жұбайын ата-ана құқығынан айыруды сұрап, сотқа жүгінген. Алайда сот отбасында екі бала барын және әйелдің үшінші балаға аяғы ауыр екенін ескеріп, талапты қанағаттандырмаған.
Әкесі бұл шешімді әділетсіз деп санап, істі қайта қарауды талап етіп отыр.
Оқиға өңірде кең пікірталас туғызды. Құқық қорғаушылар балалардың құқығын қорғауды күшейту қажеттігін айтса, заңгерлер мұндай жағдайлардың алдын алу үшін істерді жан-жақты қарастыруды талап етуде.