Астана. 25 қыркүйек. BM.KZ – Петропавл қаласындағы №50 түзеу мекемесінде жазасын өтеп жатқан әйелдерге туыстарымен онлайн байланыс жасауға мүмкіндік беретін бейнетаксофон жүйесі іске қосылды.
Бұл бастама Мемлекет басшысы Қасым-Жомарт Тоқаевтың биылғы 14 наурыздағы Құрылтайда берген тапсырмасын орындау және «Заң мен Тәртіп» тұжырымдамасын жүзеге асыру аясында қолға алынған.
Бас прокуратураның мәліметінше, жаңа жүйе ең алдымен кәмелетке толмаған балалары бар аналардың әлеуметтік жағдайын жеңілдетіп, жазасын өтеушілердің тұрмысын ізгілендіруге бағытталған.
Жаңа сервистің ерекшелігі – сотталған әрбір әйелге жеке ID-код беріледі. Олар бейнеқоңырау, аудио және бейнехабарлама, SMS арқылы тек жеке ісінде тіркелген телефон нөмірлеріне ғана хабарласа алады. Ал туыстары байланыс ақысын Google Play арқылы «Soilephone» қосымшасы арқылы төлей алады.
Сондай-ақ, жүйе толықтай қорғалған серверде жұмыс істейді. Бұл дербес мәліметтердің қауіпсіздігіне кепілдік береді.
Жаңашылдық бірнеше маңызды нәтижеге жол ашады:
• сотталғандардың психологиялық қысымын азайтады;
• отбасылық байланыстарды сақтап, нығайтады;
• заңға бағынуға ынталандырады;
• әйелдердің бостандыққа шыққаннан кейінгі қоғамға бейімделуіне ықпал етеді.
Жобаны іске асыруға облыс прокуратурасы, Қылмыстық-атқару жүйесі департаменті және «Жас Тарлан» ЖШС атсалысуда.