Павлодар. 31 шілде. BM.KZ – «TAKORP» қаржы пирамидасын ұйымдастырған тұлғаларға қатысты қылмыстық іс бойынша сот үкімі шықты. Сот оларды кінәлі деп танып, әрқайсысына 1 жыл 6 айдан 7 жылға дейін бас бостандығынан айыру жазасын тағайындады.
«АҚШ-тағы жарнамалық қосымшалар платформасы» ретінде ұсынылған «TAKORP» жобасы қаржы пирамидасы болып шықты. Жоба жарнама саласындағы «инновациялық технологиялармен» жұмыс істейтінін айтып, азаматтарды сендірген. Қатысушылардан тіркелу үшін криптовалюта сатып алу талап етілген. Бұл операциялар «ОКХ» криптобиржасы арқылы жүзеге асқан.
Жүйеге кіру үшін кемінде бес жаңа қатысушыны тарту міндеттелген көрінеді. Сол арқылы жәбірленушілер «сәттілік дөңгелегіне» қатысып, қымбат сыйлық ұтуға мүмкіндік алған.
Жоғары табыс табатынына сенген 80-нен астам азамат әрқайсысы 30-дан 500 АҚШ долларына дейін қаражат салған. Оларға салым деңгейіне қарай 2000 долларға дейін бонус алатынын айтап сендірген. Осылайша жоба аясында заңсыз алынған жалпы сома 59 миллион теңгеден асқан.
Пирамиданы жарнамалау үшін Zoom платформасы арқылы бейнеконференциялар ұйымдастырылған. Ресми түрде мұндай кездесулердің мақсаты салымшылардың материалдық жағдайын жақсартуға бағытталды деп көрсеткенімен ұйымдастырушылар шын мәнінде негізгі назарды жаңа қатысушыларды тартуға аударған.
Тергеу барысында қаржы пирамикасының иелері салымшылардың ақшасына Павлодардан пәтер сатып алып, банктерде төрт депозит ашқаны анықталды. Бұл мүліктерге сот санкциясымен тыйым салынды.
Сот шешімі әзірге заңды күшіне енген жоқ. Жәбірленушілерге келтірілген шығындарды өтеу мәселесі азаматтық сот өндірісі аясында қаралады.