Астана. 1 желтоқсан. BM.KZ — Украина сыртқы істер министрлігі Новороссийскідегі Каспий құбыр консорциумының (КҚК) нысанына жасалған шабуылдан кейін Қазақстанның ресми наразылығына түсініктеме берді. Киевтің айтуынша, бұл соққылар Қазақстанға қарсы бағытталмаған, керісінше Ресейдің қарулы әрекеттерінен қорғану мақсатындағы шаралардың бір бөлігі.
Украина сыртқы істер министрлігінің ресми өкілі Георгий Тихий Қазақстанның КҚК-ның теңіздегі айлақ құрылғысына жасалған шабуылға байланысты білдірген наразылығына қатысты пікір білдірді. Украина тарапының сөзінше, бұл соққы қорғаныс операциясының аясында жүзеге асқан және оның Қазақстанға еш қатысы жоқ.
Георгий Тихий Украина Астананың алаңдаушылығын ескеретінін атап өтті:
— Украина тарапынан жасалған ешбір әрекет Қазақстан Республикасына немесе өзге де үшінші елдерге қарсы бағытталмаған. Біздің барлық күшіміз БҰҰ Жарғысының 51-бабы аясында Ресейдің агрессиясына тойтарыс беруге жұмылдырылған.
Ол, сонымен қатар, соққылар Украина «агрессордың инфрақұрылымы» деп санайтын нысандарға бағытталатынын, өйткені мұндай нысандар Ресейдің әскери қуатын арттыруға ықпал етіп жатқанын жеткізді.
— Бүгінгі алаңдаушылыққа орай, қазақ тарапынан осыған дейін Ресейдің Украинадағы бейбіт халыққа, тұрғын үйлерге, азаматтық инфрақұрылымға және еліміздің энергетикалық жүйесіне, соның ішінде атом электр станцияларының қосалқы станцияларына жасаған соққыларын айыптаған мәлімдемелердің болмауына назар аударамыз. Бар-жоғы екі күн бұрын Ресей тоғыз сағатқа созылған бір мезгілде зымырандар мен дрондар арқылы шабуыл жасады. Соның салдарынан бейбіт тұрғындар қаза тауып, жараланды, ал Киев қаласының кемінде 500 мың тұрғыны және Киев облысының 100 мыңнан астам адамы жарықсыз қалды, – деді Украина Сыртқы істер министрлігінің өкілі.
Украина тарапының мәлімдеуінше, аймақтағы тұрақсыздықтың «бірден-бір себебі» – Ресей жүргізіп отырған агрессия.
Еске салайық, бұған дейін Қазақстанның СІМ Каспий құбыр консорциумына жасалған шабуылға байланысты наразылық білдірген болатын.