Астана. 7 тамыз. BM.KZ – Энергетикалық және коммуналдық секторларды жаңғырту жөніндегі ұлттық жоба 2024 жылғы желтоқсанда бекітілді. Ұлттық жобаны заңнамалық тұрғыдан қамтамасыз ету үшін мемлекет басшысы 17 шілдеде заңға қол қойып, ол 29 шілдеде күшіне енді. Алдын ала бағалау бойынша Ұлттық жобаны 5 және одан да көп жылға жүзеге асыруға 13 трлн теңгеден астам инвестиция тарту қажет. Бұл туралы премьер-министрдің орынбасары Қанат Бозымбаев Үкіметте өткен баспасөз мәслихатында айтты.
Ол қаражат 86 мың шақырым коммуналдық желілерді жөндеу және салуға, жиынтық көлемде 7,3 Гвт қосымша генерациялау көздерін іске қосуға жұмсалақ.
Қаражатты 4 қаржы көзінен тарту қарастырылып отыр. Олар:
— отандық және халықаралық қаржы институттары;
— екінші деңгейдегі банктер;
— бюджет және Ұлттық қор қаражаты;
— акционерлер — бизнес иелерінің қаражатынан.
ЭКСЖ-ға қатысуға пилоттық жоба ретінде 35 табиғи монополия субъектісі (ТМС) бекітілді. Қарастыру сатысында тағы 22 жоба тұр. Жыл соңына дейін 6 инфрақұрылымдық компания тозудың «қызыл» деңгейінен «орташа» деңгейіне көшіп, тозу деңгейін 40%-ға дейін төмендетеді деп болжанады.
Биыл пилоттық режимде жалпы құны 150 млрд теңгеге жуық инвестиция тартылып жатыр. Оған 8,5 мың шақырым желіні жөндеп, 42 мыңнан астам жабдықты ауыстыру жоспарланған.
Елішілік құндылықты арттыру бөлігінде жалпы құны 2 трлн 140 млрд теңгеге 2 786 тауар позициясы айқындалды, олар бойынша 220 отандық тауар өндірушілерден пул жасақталды. Бұдан бөлек өңірлер бөлінісінде лицензия алған 669 EPC-мердігерге талдау жүргізілді.
Отандық тауар өндірушілерді дамыту импортқа тәуелділікті азайтып қана қоймай, қосымша жұмыс орындарын құруға, сондай-ақ бюджетке түсетін салық түсімдерін ұлғайтуға мүмкіндік береді.
Цифрландыру аясында екі негізгі бағыт жүзеге асырылып келеді. Олар – «Самұрық-Қазына» порталы негізінде құрылған Ұлттық жобаның Электронды сатып алу платформасы және «SMART TURMYS» ТКШ ақпараттық жүйесі.
Сондай-ақ арнайы web-портал мен байланыс орталығы әзірлену үстінде, онда Ұлттық жобаның орындалу барысы туралы барлық ақпарат жалпыға қолжетімді болады.