Астана. 5 тамыз. /Нұргүл Жолымбетова/ BM.KZ – Қырғыз Республикасында өтетін VI Дүниежүзілік көшпенділер ойындарының бағдарламасына қазақтың ұлттық ойыны-көкпар енбейтін болды. Бұл туралы Қырғызстанның Дене шынықтыру және спорт жөніндегі мемлекеттік агенттігінің директоры Айбек Абдымомунов мәлімдеді. Оның айтуынша, көкпардың орнына көкбөрі ойыны жаңа форматта өткізіледі.
«Жаңа форматқа сәйкес, бір клубтың құрамында түрлі елдің спортшылары бірге ойнай алады. Мысалы, бір командада Қырғызстан, Қазақстан, Өзбекстан немесе Венгрия ойыншылары бірге бақ сынауы мүмкін. Бұл, көкбөріні халықаралық деңгейде дамытып, оны саяси даудан арылту жолындағы қадам», – деді Абдымомунов.
Естеріңізде болса, Астанада өткен V Көшпенділер ойындарының финалдық кездесуінде Қазақстан мен Қырғызстан құрамалары арасында жанжал туындап, ойын уақытша тоқтатылған. Қақтығысқа қамшы қолдану себеп болған. Бастапқыда 3:1 есебімен алда келе жатқан қырғыз командасы ойын қайта жалғасқан соң 4:5 есебімен жеңіліп қалды.
Ойын соңында Қырғызстан құрамасының ойыншылары марапаттау рәсіміне наразылық танытып, күміс медальдарын сахнада шешіп тастаған болатын. Кейін олар ресми түрде наразылық білдіріп, қайта матч өткізуді ұсынғанымен, реванштық кездесу ұйымдастырылған жоқ.
Сондықтан, ұйымдастырушылар алдағы ойындарда жаңа формат енгізуді ұйғарып отыр. Бұл тәсіл саясаттан арылған, таза спорттық бәсекелестікті қамтамасыз ету мақсатында жолға қойылды дейді ұйымдастырушылар.
Айта кетейік, 2026 жылы VI Дүниежүзілік көшпенділер ойыны Қырғызстанда өтеді.